Foto: Qaraǵandy oblysy ákimdigi
Botaqaradaǵy gaz ballony jarylysynan zardap shekkenderge kómek kórsetiledi, dep habarlaidy "Ult aqparat" Qaraǵandy oblysy ákimdiginiń baspasóz qyzmetine silteme jasap.
Ákimdik málimetinshe, Buqar jyraý aýdanynyń Botaqara kentinde zardap shekkenderge keltirilgen zalaldy baǵalaý jónindegi arnaiy komissiia qurylady. Barlyǵyna qajetti kómek kórsetiledi.
"Eń aldymen, qaza tapqandardyń týystaryna kóńil aitqymyz keledi. Qaza tapqandardyń otbasylaryna kómek kórsetiledi. Biz zalaldy baǵalaýmen ainalysatyn komissiia quramyz. Eshkimdi problemasymen jalǵyz qaldyrmaimyz", – deidi aýdan ákimi Abylai Sultanǵali.
Bul rette, jergilikti atqarýshy organ jergilikti sipattaǵy tótenshe jaǵdai jariialady.
Aýdan ákiminiń aitýynsha, úi QazMIRR sarapshylarynyń qatysýymen tekserilip jatyr. Turǵyndar ázirge týystarynyń úilerine ornalastyrylǵan, olardy odan ári qonystandyrý jáne úidiń taǵdyry týraly máseleler sheshiletin bolady.
Aita keteiik, Botaqara kentinde 30 qańtar saǵat 00:07-de eki qabatty 12 páterli úidiń ekinshi qabattaǵy páterinde tsilindrlik gaz jaryldy.
Páterdiń ústindegi shatyr, qabyrǵalar men edender, sonyń ishinde birinshi qabattaǵy páter tolyǵymen qirady. Basqa páterler de ishinara zaqymdalǵan.
"Úide turatyn 46 turǵynnyń 35-i jarylys kezinde úilerinde bolǵan. TJ saldarynan eki adam qaza taýyp, beseýi zardap shekti. Zardap shekkenderdiń arasynda úsh bala bar. Dárigerlerdiń tekserisinen keiin eki bala úiine jiberildi. Bir bala OBKA-ǵa jetkizildi, sonymen qatar aýrýhanada eki eresek adam bar, olardyń bireýi óte aýyr jaǵdaida" - delingen habarlamada.
Oqiǵa ornynda jedel shtab jumys istep jatyr.
"Úiindiler tazartyldy. Jergilikti atqarýshy organdar barlyq qajetti tehnikany ýaqtyly usyndy, sonyń arqasynda bes adam qutqaryldy. Adamdar úiindilerdiń astynda, plitalardyń astynda qalyp qoiǵan. Krandar men úsh ekskavator tartyldy. Qazir TJD men politsiia qyzmetkerleri tekserý júrgizýde. Jarylystyń aldyn-ala sebebi – gaz ballonynyń durys jumys istemeýi. Gaz ballony sýyqtan jyly bólmege kirgizilgen. Bolǵan oqiǵaǵa kim kináli ekenin quqyq qorǵaý organdary anyqtaidy", – dedi Qaraǵandy oblysy TJD bastyǵynyń orynbasary Amanbek Beisembaev.
