Oppozitsiialyq saiasatker Aleksei Navalnyimen bir túrmede otyrǵan Nariman Osmanov pen Evgenii Býrak "Dojd" telearnasyna oppozitsionerge qamaýda qalai qysym kórsetilgeni týraly aityp berdi, dep habarlaidy Azattyq.
Osmanovtyń sózine qaraǵanda, koloniiadaǵy otriad Navalnyiǵa qysym kórsetý maqsatynda arnaiy jasaqtalǵan. Otriadtaǵylardyń bárine Navalnyimen sóilespeýdi, onyń árbir qadamyn jazyp otyrýdy aldyn ala eskertken.
Evgenii Býraktyń "Dojd" telearnasyna baiandaýynsha, koloniiada kem degende on adam Navalnyidy ańdyp, únemi tóńireginde júrgen. Saiasatker ájethanaǵa barǵan ýaqytta da sońynan qalmaǵan. Olar únemi oppozitsionerdi arandatýmen bolǵan. Alaida Navalnyi olardyń arandatýshylyq áreketine kónbegen.
Osmanovtyń aitýynsha, koloniiada Navalnyidy jazasyn óteýshiler aldynda jamanatty etý maqsatynda film kórsetilgen. "Bul dáristi mekemedegilerdiń bárine kórsetken. Filmdegi basty oi - onyń [Navalnyidyń] dástúrli emes jynystyq kózqarasta ekenine sendirý", – deidi Osmanov. Onyń aitqandaryn Evgenii Býrak ta rastady.
Osmanov saiasatkerdiń koloniiada ashyqqany týraly da aityp berdi. Ashyǵý kezinde Navalnyidyń qasyna týberkýlezben aýyrady delingen bir adamdy ornalastyrǵan, biraq onysy ótirik bolyp shyqqan. Kúnderdiń birinde koloniiaǵa jarty qap shujyq alyp kelip, Navalnyidyń saǵyn syndyrý úshin shujyqty qýyrǵan.
Oppozitsiialyq saiasatker Aleksei Navalnyi biyl qańtarda Germaniiadan Reseige oralǵan ýaqytta ustaldy. Ony byltyr tamyzda Germaniiaǵa "Novichokpen" ýlanǵan ýaqytta ushaqpen jetkizgen. Navalnyi ózin Resei federaldyq qaýipsizdik qyzmetiniń qyzmetkerleri ýlady dep sanaidy. 2 aqpanda sot saiasatkerdi Vladimir oblysy Pokrov qalasyndaǵy koloniiaǵa jiberdi.
31 naýryzda Navalnyi ashtyq jariialap, úsh apta boiy tamaq ishpedi. Ol koloniiaǵa táýelsiz dárigerlerdi jiberýdi talap etti.
Adam quqyqtaryn qorǵaýshylar, birneshe eldiń biligi, Nobel syilyǵynyń iegerleri men álem juldyzdary Navalnyiǵa arasha tústi. Saiasatkerdi qoldaýshylardyń narazylyq aktsiialary Resei men álemniń ondaǵan qalasynda ótti. Reseidegi aktsiia kezinde myńǵa jýyq adam ustaldy.
