Kórneki foto: egemen.kz
Batys Qazaqstan oblysynyń Resei Federatsiiasymen shektesetin 8 aýdanynyń 7-inde bala sanynyń azdyǵyna bailanysty mektepter jabylmaqshy. Bul týraly Májilis depýtaty Nartai Sársenǵaliev málimdedi, dep habarlaidy Ult.kz.
"Qazir bir qaýipti tendentsiia bar, aýylyndaǵy mektep jabylǵandyqtan basqa eldi-mekenge májbúrli túrde oqýǵa attanǵan oqýshylardyń ata-analary da kóship jatyr. Al adamy kóshken aýyldyń kartadan óshetini belgili. Bul Qazaqstanǵa úlken qater tóndiredi, bir ǵana derek aitaiyn: sońǵy 5 jylda elimizde 194 aýyl jabylyp qaldy. Búgingidei buiryqtyń buidasymen kete bersek bul san kóbeietini anyq. Sebebi mekteptiń jumys istep turýy úshin belgilengen eń az oqýshy sanyna suraq jetip artylady. Óitkeni bir óńirde adam kóp, bir óńirde adam az. Sondyqtan bir standartta bárine birdei tańý qate. Endeshe atalǵan normativterdi qaita qaraityn kez keldi", - deidi N. Sársenǵaliev.
Osyǵan orai depýtattyń naqty usynysy: Qazaqstan Respýblikasynyń Bilim jáne ǵylym ministrliginiń 2022 jylǵy 6 mamyrdaǵy №185 «Halyqtyń tyǵyzdyǵyna jáne eldi-mekenderdiń qashyqtyǵyna qarai bilim berý uiymdary jelisiniń kepildik berilgen memlekettik normativin bekitý týraly» buiryǵynda kórsetilgen 2.2., 2.3., 2.4. - tarmaqtaryn «erekshe jaǵdaida degen tirkespen tolyqtyrý nemese shekara mańynda ornalasqan mektepter úshin atalmysh tarmaqtarda belgilengen normativterdiń shegin azaitý.
"Áitpese shekaralyq aýyldar mektepsiz qalady, saldarynan el kóshedi, jer iesiz bolady. Al «bos jatqan jer jaý shaqyrady», bul qazaqtyń sózi", -dep sózin qorytyndylady depýtat Nartai Sársenǵadiev.
