Boryshkerler shaǵymdaný quqyǵyn kóbine teris paidalanady. Bul týraly búgin Májilistegi Úkimet saǵatynda Ádilet ministri Qanat Mýsin aitty, dep habarlaidy QazAqparat.
«Búgingi tańda zań boiynsha jeke sot oryndaýshynyń áreketteri men sheshimderine tek sot arqyly shaǵymdanýǵa bolady. Mundai sot daýlary barlyq satylardy qosa alǵanda 11 aiǵa deiin sozylýy múmkin. Bul rette sottyń negizgi sheshimi oryndalmai jata beredi. Adamdar sot ózderiniń paidasyna óndirip bergen nárseni ala almaidy. Boryshkerler shaǵymdaný quqyǵyn kóbine teris paidalanady jáne onyń oryndaý protsesin sozý úshin paidalanady. Osy ýaqyt ishinde olar múlik pen aqshany jasyrady», - dedi ministr.
Onyń atap ótýinshe, sot tájiribesinde jeke sot oryndaýshylaryna qatysty 200-ge jýyq talap-aryz tatýlasýmen nemese myńnan astam talap-aryz qaitaryp alýmen aiaqtalǵan.
«Daý sotqa deiin óńirlik palatalar deńgeiinde sheshilýde. Mundai tájiribeni jariia etý jáne óńirlik palatalarynyń laýazymdy adamdaryna jeke sot oryndaýshylarynyń sheshimderin joiý jóninde ókilettikter berý qajet dep oilaimyz. Bul daýlardy qaraý ýaqytyn qysqartady jáne taraptardyń quqyqtaryn qorǵaýǵa oń áser etedi», - dedi Qanat Mýsin.
