Ońtústik Qazaqstan oblysy, Ordabasy aýdanynda ornalasqan eń sońǵy úlgidegi qondyrǵylarymen jabdyqtalǵan «Bórte-Milka» keshendi sút fermasy taiaýda sút óńdeý zaýytyn iske qospaq, dep habarlaidy "Ult aqparat" aimaq basshysynyń baspasóz qyzmetine silteme jasap.
Táýligine 50 tonna sútti óńdeýge qaýqarly kásiporyn qaimaq pen airan jáne balalarǵa arnap «Bórte Milka» iogýrtynyń 6 túrin shyǵaratyn bolady. Kásipkerdiń aitýynsha, qazirgi tańda zaýyt iske qosylýǵa tolyqtai derlik daiyn. Jumysyn bastaǵan kúnnen bastap shaǵyn fermerlerden de sút qabyldai bastaidy. Olarmen kelisimshart jasalady.
Kompaniia kesheni óńirdegi jalǵyz robottandyrylǵan sút-taýarly ferma bolyp sanalady. Ferma shvedtiń DeLaval kompaniiasynyń eń zamanaýi tehnologiiasyn qoldanyp soǵylǵan.
Mundaǵy barlyq jumysty derlik robottar atqarady - siyrdy tazalap, saýady jáne turatyn ornyn tazalaidy. Jemdeletin siyrlardy salqyndatý júiesi, meteostantsiiasy bar jeldetkish júiesi, kúndizgidei jaryq júiesi, siyrdyń toiǵanyn anyqtaý kameralary ornatylǵan.
Investitsiia kólemi 2,4 mlrd teńgeni quraidy. Munda Goldshtein Friz tuqymdas 700 siyr bar. Árqaisysyna biregei kody bar chip ornatylǵan. Saýyn siyr týraly aqparat jalpy kompiýterge túsedi. Ár siyrdan táýligine 30-40 litr sút saýylady. Osylaisha bir táýlikte shamamen 9 tonna sút jinalýda.
Osynaý jumystyń barysymen búgin oblystyq kásipkerlik, indýstriialdy-innovatsiialyq damý jáne týrizm basqarmasy uiymdastyrǵan press-týr barysynda BAQ ókilderi men blogerler tanysyp kórip qaitty.
