Fýtboldan Qazaqstan Ulttyq quramasynyń bas bapkeri qyzmetine Aleksandr Genrihovich Borodiýk taǵaiyndaldy, dep habarlaidy "Ult aqparat" QFF-nyń baspasóz qyzmetine silteme jasap.
Basty sebeptiń biri Aleksandr Borodiýktiń bizdiń quramamen jumys isteýge degen yqylasy bolǵan eken. Ol birqatar ulttyq quramalar men ózge elderdiń fýtbol uiymdarynyń usynystarynan bas tartypty.
"Federatsiianyń jattyqtyrýshylar keńesi onyń ulttyq quramalarmen jumys tájiribesiniń moldyǵy men qazaq fýtbolyna jaqyndyǵyn eskerdi" delingen habarlamada.
Kelisimshart úsh jylǵa eseptelgen. Jańa bapkerge jergilikti jas talanttardy ashý, quramany jasartý mindeti júkteldi. Qazaqstan fýtbol federatsiiasy bul tapsyrmany júzege asyrýǵa Aleksandr Borodiýktiń mol tájiribesi jetetinine senimdi.
Talǵat Marýanuly Baisýfinovtiń Qazaqstan Ulttyq quramasyndaǵy jemisti eńbegi men otandyq fýtboldyń erekshelikterin jetik biletini eskerilip, QFF jetekshileri ony Federatsiianyń tehnikalyq direktory qyzmetine taǵaiyndaý týraly sheshim qabyldady.
Talǵat Marýanuly U-17 quramasynan bastap ulttyq quramaǵa deiingi komandalardyń jumysyn jaqsy uiymdastyrý qabiletine ie jáne quramalardyń bapkerlerine ádistemelik kómek kórsete alady.
Sonymen qatar, onyń jańa qyzmetine fýtbol klýbtary men ortalyqtarynda qurama úshin fýtbolshylar daiyndaý mindeti kiredi.
