Qostanailyq politsei Amantai Baijanov avtokólik tizbegine jol kórsetý úshin boranda júgirip júrdi, dep habarlaidy "Ult aqparat".
Video oblystyq politsiia departamentiniń Instagram paraqshasynda jariialandy.
Kadr syrtyndaǵy júrgizýshiniń sózine sensek, tártip saqshysy qatty jel, qar men sýyqqa qaramastan, 10 avtokólikten turatyn avtotizbek jolynan adaspai qalaǵa jetýi úshin aianbai eńbek etken.
Jalpy politsei jol kórsetem dep shamamen eki shaqyrymdy júgirip ótken.
«Kóliktiń, avtotizbektiń aldyna shyǵyp, qalaǵa qalai jetý keregin kórsetip júrgen osyndai politsiia qyzmetkerlerine alǵys aitamyn. Qatty boran soǵyp tur! Jol kórinbeidi», - deidi ol.
Jeli qoldanýshylary da videonyń astyna súisinip, pikir qaldyrǵan.
«18-19 aqpan kúnderi aýa raiy nasharlaǵandyqtan oblys aýmaǵynda tótenshe jaǵdaidy, adamdardyń ólimin, úsip qalýyn, sondai-aq jol-kólik oqiǵalaryn boldyrmaý maqsatynda jergilikti politsiia qyzmetkerleri oblys aýmaǵyndaǵy joldardy japty. Eldimekenderden shyǵýǵa tyiym salyndy» dedi óńirdiń PD baspasóz qyzmeti.
Politsiia qyzmetkerleri kóriný nasharlap, qar qursaýynda qalǵan kólik júrgizýshilerine kómek kórsetti. Máselen, 18 aqpanda saǵat 17:00-de quramynda Qostanai politsiia basqarmasynyń inspektory, politsiia leitenanty Ámir Shalǵymbaev pen politsiia leitenanty Amantai Baijanov bar Qostanai qalasy PB patrýldik politsiia batalonynyń qyzmetkerleri Qostanai qalasyna Fedorovka jaqtan kiretin Nazarbaev kóshesi boiyndaǵy avtokólikterdi alyp júrý jóninde sheshim qabyldady, óitkeni qatty borannan eshteńe kórinbei ketken edi.
«Politsiia leitenanty Amantai Baijanov patrýldik kólikten shyǵyp, Nazarbaev kóshesimen «Qostanai plaza» jaqqa qarai qozǵalyp bara jatqan avtotizbektiń aldyna shyǵyp, júgirgen. Jol-kólik oqiǵasyn boldyrmas úshin avtotizbektiń sońynda belgi berip patrýldik kólik júrdi» dep pikir bildirdi mekemeniń baspasóz qyzmeti.
Bul - Amantai Baijanovtyń alǵashqy qaisar áreketi emes eken. 2020 jyldyń sáýirinde ol áriptesimen birge 15 adamdy, onyń ishinde 5 jasar balany órtten aman alyp qalǵan.
Amantai Baijanov politsiia organdarynda 2014 jyldyń qańtarynan beri qyzmet etip keledi.
