Foto: videodan alynǵan kadr
Ishki ister ministrligi bopsalaýshylar tobyn anyqtaýǵa jáne olardyń jolyn kesýge erekshe nazar aýdarady. Jyl basynan beri IIM uiymdasqan qylmysqa qarsy kúres bólinisteri 130-dan astam osyndai faktini anyqtap, jolyn kesti. Onyń ishinde qylmystyq toptar jasaǵan faktiler de bar, dep habarlaidy Polisia.kz.
8 aqpanda aýyr qylmys jasady dep kúdikke ilingen Qyzylorda oblysynyń alty turǵyny Astana – Pavlodar avtojolynda ustaldy.
Mysaly, olar eki tanysyn kúshtep kólikke otyrǵyzyp, páterge alyp kelip, uryp-soǵyp, qarý-jaraqpen qorqytyp, eki kún boiy ustap, 300 myń teńge men uialy telefondaryn tartyp alǵan.
Sonymen qatar taǵy bir million teńge talap etken. Jábirlenýshilerdiń biri qashpaq bolyp, besinshi qabattan sekirip ketip, kóp jaraqat aldy.
Kúdiktiler ekinshi jábirlenýshini kólikke otyrǵyzyp alyp, izin sýytpaq bolǵan kezde ustaldy. Bul fakti boiynsha Qylmystyq kodekstiń birneshe babymen qylmystyq is tergelip jatyr.
Oralda politsiia qyzmetkerleri kolledj stýdentterinen quralǵan qylmystyq topty ustady.
Olar bopsalaý, tonaý jáne alaiaqtyqpen ainalysqan. Atalǵan fakti boiynsha segiz qylmystyq is tergelýde jáne kúdiktilerdiń basqa qylmystarǵa qatysy bar-joǵyn anyqtaý boiynsha sharalar qabyldanýda.
Aqmola oblysynda eki jastar toby arasyndaǵy qaqtyǵysqa tosqaýyl qoiyldy.
Oqiǵa ornynda travmatikalyq jáne sýyq qarý, dýbinkalar, sondai-aq soqqy jasaýǵa arnalǵan basqa da metall jáne aǵash zattar tabylyp, tárkilendi.
Qazirgi tańda bir top adam jasaǵan buzaqylyq faktisi boiynsha is qozǵaldy.
– Barlyq fakti boiynsha kúdiktiler ustaldy. Tergeý múddesinde ózge aqparat jariialanbaidy. Qurmetti azamattar, eger sizder qylmystyq toptar tarapynan qol suǵýshylyqqa tap bolsańyzdar, dereý politsiiaǵa habarlasyńyzdar. Biz sizdiń aqparatyńyzdyń qupiialylyǵyna kepildik beremiz jáne sizdi qorǵap, qaýipsizdigińizdi qamtamasyz etýge bar kúsh-jigerimizdi salamyz, – dedi departament bastyǵy – IIM resmi ókili Shyńǵys Alekeshev.
