QR Tuńǵysh Prezidenti Nursultan Nazarbaev álemdik ahýalǵa áser etip otyrǵan Iran daǵdarysyna qatysty pikir bildirdi, dep habarlaidy "Ult aqparat".
«Biz bul máseleni kóp talqyladyq. Bul problemaǵa qatysty naqty qazir jaýap aitý – men úshin óte qiyn. Iranmen jasalǵan kelisimniń toqtap turǵany ókinishti. Árine, kezinde jasalǵan kelisimniń joiylmaǵanyn qalaimyz. Bári kelisti, mámilege keldi – Iran usynystardy qabyl aldy. Qazaqstan bul iske qatysty. Kelissóz osynda ótkizilgen edi. Iran prezidentimen de birneshe ret kezdesip, oǵan Qazaqstannyń sovet dáýirinen keiin iadrolyq memleketke ainalyp qalǵanyn aitqan edim. Qazaqstannyń ol kezde poligony, 1100 oqtumsyǵy bar 110 iadrolyq zymyrany, alys qashyqtyqqa beiimdelgen qarýy boldy. TMD boiynsha eseptegende onyń bárin ózimizdiki dep aitýǵa bolar edi», - dedi Nursultan Nazarbaev Astana Club otyrysynda.
Elbasynyń aitýynsha, qazir álemde 7,5 myń iadrolyq oqtumsyq bar.
«Soltústik Koreiaǵa da, basqasyna da aitarym - qolǵa bomba ustap alyp, bárinen qorqyp otyrǵannan góri álemdik qaýymdastyqtyń jaǵymdy nazaryn aýdaryp, investitsiia alyp, eldi damytqan abzal. Óz elińdi qarýmen qorǵap qalasyń ba, álde qurtyp alasyń ba – ekeýi eki túrli nárse. Sol sebepti qazir ol másele tyǵyryqqa tireldi», - dedi ol.
Nursultan Nazarbaev óz sózinde Iran máselesin kezinde jetkizilgen kelissóz núktesine qaita alyp kelý kerek.
«Eýropa elderi men basqa da álemdik qaýymdastyqtar tarapynan Iranǵa tiisti kepil berilýi tiis. Qazirgidei bastyqtyra bermegen abzal. Ol - óte qaýipti qadam. Álemdik kómirsýtek shikizatynyń, munai qajettiliginiń 30 paiyzy Ormýz buǵazy arqyly ótedi. Teketires bola qalsa, álemdik ahýal qiyndai túsedi. Demek, bunyń bári - konfrontatsiianyń keseli. Kez kelgen máselede kelissóz kerek. Kelissózderge qaitqan jón. Men árdaiym osyǵan shaqyramyn. Qazir iri iadrolyq memleketter kelissóz ústelinde bas qosýy tiis. Álemdik soǵystardyń bári de kelissózben aiaqtalǵan. Birinshi dúniejúzilik soǵystan keiin iri derjavalar Ulttar ligasyn qurdy. Ekinshi dúniejúzilik soǵystan keiin BUU quryldy. Iaǵni, bári kelissóz arqyly sheshilgen», - dedi ol.
