Memleket basshysy Qasym-Jomart Toqaev "Qazaqstan halqyna" qorynyń tóraǵasy Bolat Jámishevti qabyldady, - dep habarlaidy "Ult aqparat" Aqorda saityna silteme jasap.
Prezidentke Qordyń azamattarǵa kórsetken kómegi boiynsha esebi, sondai-aq qaiyrymdylyq qyzmetti uiymdastyrý joldary jóninde aqparat berildi.
Bolat Jámishevtiń aitýynsha, qazirgi tańda Qor 10 qaiyrymdylyq baǵdarlama men jobany júzege asyryp jatyr. Atap aitqanda, olardyń segizi meditsinalyq kómek kórsetýge, bireýi aýyl balalary úshin sport salasyndaǵy áleýmettik jaǵdaidy jaqsartýǵa baǵyttalsa, taǵy biri aýyldyq jerlerden shyqqan talapkerler men az qamtylǵan otbasylardyń stýdent balalaryna bilim granttaryn berýdi qarastyrady.
Qasym-Jomart Toqaev Qordyń maqsatty baǵyttaryn anyqtaýǵa qoǵam men qoǵamdyq institýttardy belsendi túrde tartý qajet ekenine basa mán berdi.
Bolat Jámishevtiń aitýynsha, Qor jańadan tolyqtyrylǵan Tujyrymdamany jáne Qaiyrymdylyq baǵytyndaǵy baǵdarlamalar men jobalar ázirleýdi qolǵa aldy. Bul jumysqa kommertsiialyq emes sektordyń ókilderi, máslihat depýtattary, Qor metsenattary bolyp tabylatyn biznes ókilderi men sarapshylar keńinen tartylady.
Qor tóraǵasynyń aitýynsha, barlyq atqarylyp jatqan jumystar týraly tolyq aqparat qoǵam nazaryna usynylady. Qyrkúiek aiynda ótetin Ulttyq qaiyrymdylyq konferentsiiasy osy ýaqyt aralyǵynda atqarylǵan jumystyń qorytyndy esebi bolmaq.
