Memleket basshysy Nursultan Nazarbaev «Qorǵas» pen «Quryq» porttary qurylysyna jumyldyrylǵan qurylysshylarǵa alǵysyn aitty, dep habarlaidy QazAqparat.
Aita keteiik, búgin Mańǵystaý oblysynda Quryq portyndaǵy kólik habyn tanystyrýǵa arnalǵan saltanatty shara ótti. Onyń aiasynda uiymdastyrylǵan telekópir barysynda Quryq portymen «Aqjigit - Beineý» respýblikalyq avtojolynyń qurylysshylary jáne «Qorǵas - Shyǵys qaqpasy» Arnaiy Ekonomikalyq Aimaqtaǵy qurǵaq porttyń jumyskerleri bailanysqa shyqty.
«Qazirgi sátte «Qorǵas» qurǵaq porty turaqty konteinerlik poiyzdardy «Quryq» porty baǵytyna, sondai-aq ary qarai Transkaspiilik dálizben Eýropaǵa jóneltpek. Atalǵan logistikalyq tizbek Qytai, Kavkaz jáne Eýropa úshin tartymdy bolyp otyr. Osy oraida birqatar elderdiń mýltimodaldyq baǵdarlaryn bailanystyratyn poiyzdyń júrýine ruqsat berińiz», - dedi «Qorǵas-Shyǵys qaqpasy» AEA BK» AQ Bas direktory Murat Baimuhanbetov.
Óz kezeginde Elbasy atalǵan turaqty konteinerlik poiyzdyń qozǵalysyn bastaýǵa ruqsat berdi.
«Biraz ýaqyttan beri «Qorǵasty» tolyq qýatyna qosý úshin jumys istep kelemiz. Bolashaqta Qorǵas úlken shaharǵa ainalady jáne júk ótkizýde aýqymdy torap bolady. Meniń oiymsha, Qytai provintsiialary osy port arqyly júkterin tasymaldaidy. Sáikesinshe, bizdiń Ortalyq Aziiadaǵy barlyq kórshilerimiz ben Resei bul portty paidalaný múmkindigine ie. Atqarǵan jumystaryńyz úshin alǵysymdy bildiremin», - dedi Memleket basshysy.
Budan buryn habarlanǵandai, QR Prezidenti Ózbekstan men Qazaqstan arasyndaǵy joldy ashýǵa ruqsat berdi.
