Bilim jáne ǵylym ministrligi «Bolashaq» baǵdarlamasyna irikteý jumysy biyl Prezidenttik jastar kadrlyq rezervin irikteý ádisimen ótkizilgenin jariia etti, dep habarlaidy "Ult aqparat".
Ministrliktiń málimetinshe, biyldan bastap «Bolashaq» halyqaralyq stipendiiasyn taǵaiyndaýdyń konkýrstyq rásimderi tolyǵymen avtomattandyrylyp, biryńǵai onlain-platformada ótip jatyr. Úlgi retinde Prezidenttik jastar kadrlyq rezervine irikteý júiesi alynǵan.
«Birinshiden qujat qabyldaý tolyq avtomattandyryldy. Ol tek egov.kz portalynda júzege asyrylady. Ekinshiden úmitkerdiń ótetin barlyq irikteý kezeńi tsifrlandyrylǵan. Úmitkerge jeke kabinetinde biregei kod beriledi. Ótinish berýshiniń jeke derekteri biregei sáikestendirý júiesi arqyly kodtalady. Úshinshiden, irikteýdiń I kezeńi – keshendi testileý mazmuny sapalyq turǵydan ózgertildi. 2020 jyldan bastap úmitkerlerdiń ózdiginen ótinish berýine qoiylatyn negizgi talaptardy eskere otyryp, pándik bilimdi tekserý qajettigi joiyldy. Onlain formatta ótetin testileý endi verbaldyq, sandyq jáne daǵdylyq-tulǵalyq suraqtardan turady. Sondai-aq suraqtar úmitkerdiń qysqa merzimde jańa aqparatty óńdei alý, taldaý, tulǵalyq qabiletin anyqtaýǵa baǵyttalǵan», - dep habarlaidy ministrlikten.
Sonymen qatar onlain platformada qoldanylatyn proktoring júiesi úmitkerlerdiń jumys paraǵyn qaldyryp, kelesi paraqqa ótýine nemese testileý ýaqytynda jańa terezeni ashýyna múmkindik bermeidi. Mundai jaǵdaida júie ony buǵattap, testileý nátijeleri joiylady.
«II kezeń – táýelsiz saraptamalyq komissiia múshelerimen derbes suhbat ta onlain ótip jatyr. Suhbat barysynda sarapshylar suraqtaryn úmitkerge jeke kodymen identifikatsiialaý arqyly ǵana qoiyp (aty-jónin kórmeidi), naqty kriteriiler boiynsha birden baǵalaidy. Sarapshylardyń baǵasyn júiede ǵana kórýge bolady. Árbir sarapshy óziniń úmitkerge qoiǵan jeke baǵasyn ǵana kóre alady. Konkýrstyq irikteýdiń barlyq kezeńi beine jáne aýdio jazbaǵa alynatynyn atap ótý mańyzdy. Demek, onlain format pen avtomattandyrý júiesi «Bolashaq» halyqaralyq stipendiiasyn taǵaiyndaýǵa konkýrstyq irikteýdiń sapasyn arttyryp qana qoimai, búkil irikteý júiesin ashyq, qoljetimdi, yńǵaily ári mobildi ete alady. Konkýrstyq irikteýdiń eki kezeńiniń qorytyndysy boiynsha «Bolashaq» halyqaralyq stipendiiasyn taǵaiyndaý týraly sońǵy sheshimdi Shetelde kadrlar daiarlaý jónindegi respýblikalyq komissiia qabyldaidy», - delingen habarlamada.
Bilim jáne ǵylym ministrligi 2020 jylǵy 4-9 qyrkúiek aralyǵynda konkýrstyq irikteýdiń birinshi legine «magistratýra» boiynsha 100 úmitker, «doktorantýraǵa» 9 adam, «taǵylymdamaǵa» 5 adam - barlyǵy 114 úmitker qatysqanyn habarlaidy.
