«Biz birgemiz» aktsiiasy aiasynda turmysy tómen otbasylarǵa qajetti taýarlar taratý jalǵasýda, dep habarlaidy elorda ákimdiginiń resmi saity.
«Bolashaq» qaýymdastyǵy Memleket basshysy bastamasymen qurylǵan «Biz birgemiz» aktsiiasyna qoldaý bildirdi. Búgin eriktiler men qaýymdastyq músheleri az qamtylǵan otbasylarǵa, jalǵyzbasty analar men UOS ardagerlerine azyq-túlik sebetteri men gigienalyq zattar jetkizip berdi.
«Biz «Bolashaq» prezidenttik stipendiiasynyń qaýymdastyǵy retinde, elimizdiń órkendeýine óz úlesimizdi qosqymyz keledi. Atap aitqanda, qaýymdastyqtyń basqarma múshesi Erkebulan Iliiasov «Nurly Astana» qoryna gýmanitarlyq kómek úshin 25 million teńge aýdardy. Sonymen qatar ol «Nur Otan» partiiasy janyndaǵy «Birgemiz» qoryna 50 million teńge kóleminde kómek kórsetti», – deidi «Bolashaq» qaýymdastyǵynyń atqarýshy direktory Laýra Demesinova.
Azyq-túlikterdi taratýǵa eriktiler men kómek berýge nietti qala turǵyndary qatysty. Búgingi igi sharaǵa 200-ge jýyq otbasy qatysty.
«Barlyǵyna kómek kórsetý kerek dep aitý kóp adamǵa ońai. Shyn máninde, ózge jandarǵa qol ushyn soza bastaǵan kezde, kómekke muqtaj adamdardyń ártúrli ómirlik jaǵdaiyn kóresiz. Sondyqtan erikti bolý – úlken eńbek ekenin aitqym keledi. Kóbine adamdar qýanyp jatady. Bul jasaǵan eńbektiń aqtalǵany dep oilaimyn», – deidi volonter Islanbek Baimanov.
