«Bolashaq» baǵdarlamasy boiynsha oqyp kelgenderge múmkindik berý kerek. QR Tuńǵysh Prezidenti Nursultan Nazarbaev «Nur Otan» partiiasy Saiasi keńesiniń keńeitilgen otyrysynda osylai dedi, dep habarlaidy "Ult aqparat".
«Bolashaq» qaýymdastyǵynda úlken áleýet bar. Qaýymdastyq qazirgi tańda 10 myń adamdy biriktirip otyr. Bárin de bir kezderi memleket oqýǵa jiberdi. Al qazir ata-analar balalaryn shetelde oqytýǵa odan ary qumar. Búgingi tańda Qazaqstan syrtynda bizdiń 60 myńǵa tarta otandasymyz oqyp jatyr. Tipti, odan da kóp bolýy múmkin. Reseidiń ózinde ǵana – 16 myń. Olar kelip, jumysyn isteidi. Olarmen jumysty jalǵastyrý kerek», - dedi Tuńǵysh Prezident.
Elbasy bir kezderi «Bolashaq» boiynsha oqý bitirip kelgender jappai oblystarǵa tarap, eńbek etkenin eske aldy.
«Olar aýdan jáne oblys ákimderiniń orynbasary boldy. Nelikten bul jumys toqtap qaldy? Mine, máselen, biz oqýǵa jibergenderdiń biri – Altai Kólginov. Kezinde biz ony arnaiy oqýǵa jiberdik, al búgin ol qala basshylyǵynda otyr. Osyndai azamattar kóp. Bárin ne úshin daiyndadyq? Qazir otyryp alyp, oryndyqty bergimiz kelmeidi. Olardyń jaqsyraq jumys isteitinin kórip otyrmyz. Áitpese, bir jerge toqtap, damymai qalamyz. Sol sebepti, kelesi jyldyń kókteminde ótetin «Jas Otan» sezinde bilimdi jastardy jumyldyrýdy talqylaýdy usynamyn», - dedi Elbasy.
