Halyqaralyq baǵdarlamalar ortalyǵynyń basshysy Janbolat Meldeshov «Bolashaq» baǵdarlamasy túleginiń Feisbýktegi jazbasyna qatysty jaýap berdi, dep habarlaidy "Ult aqparat".
Buǵan deiin «Bolashaq» baǵdarlamasymen bilim alǵan Maigúl Sadyqova áleýmettik jelide Halyqaralyq baǵdarlamalar ortalyǵyn sotqa berýge nietti ekenin málimdegen edi.
«AQSh-taǵy oqýdan oralǵanyma 8 jyldyń júzi bolsa da, olar Pavlodar oblysy Aqsý qalasyndaǵy anamnyń páterin kepilden shyǵarmai otyr. Munyń sebebin osy jyldar boiy «Áleýmettik jumys» diplomy boiynsha jumys istemegenimmen túsindiredi. Iá, men JShS-de aýdarmashy bolyp eńbek ettim (meniń alǵashqy jumysym), keiinirek til úirenetin kýrs ashyp, sabaq berdim (Jeke kásipkerlik retinde), áli kúnge deiin aýdarma jumystarymen ainalysamyn. Sondai-aq, óz mamandyǵym boiynsha EUÝ-da magistratýrada grantta oqydym. Taǵy bir jumysym boldy - «Astana Opera» teatrynda kelisimsharttardy aýdardym. Qai jerden jumys tabylsa, sony istedim. Qansha talpynsam da, áleýmettik salada jumys taba almaýym - meniń kinám emes. Eń bastysy, óz elimde 5 jyl ter tóktim», - dep jazǵan Maigúl Sadyqova.
«Búkil el mekeme tarapynan jasalatyn qysymdy bilýi tiis. Jumysqa ornalasýǵa esh kómek kórsetpeidi, al 11 jyl burynǵy kelisimshart boiynsha, 5 jyldyq eńbek ótilimdi talap etedi. Soǵysty qalasańyzdar, ol da bolady», - dep túiindegen sózin «Bolashaqtyń» túlegi.
Keiinirek, Halyqaralyq baǵdarlamalar ortalyǵynyń basshysy buǵan áleýmettik jelide jaýap jazdy.
«Maigúl Sadyqovanyń aryzy boiynsha. Bizge soǵys kerek emes. Túlektermen jumys boiynsha departament jumysynda kemshilikter boldy, onymen kelisemin. Departament direktory sáýir aiynda óz erkimen jumystan shyqty. Maigúldi ortalyqqa shaqyrdyq. Nátijesin ortalyqtyń saitynda jariialaimyz», - dep jazdy Janbolat Meldeshov áleýmettik jelide.
Sondai-aq, Maigúl Sadyqovanyń máselesi boiynsha Halyqaralyq baǵdarlamalar ortalyǵynyń Feisbýktegi resmi akkaýntynda tolyqqandy jaýap berildi. Onda HBO basshylyǵy atalǵan túiitkildi jáne túlektermen jumys departamentiniń kemshilikterin moiyndady.
«...2015 jyldyń 6 mamyrynda stipendiat Halyqaralyq baǵdarlamalar ortalyǵyna páterdi kepilden shyǵarý týraly ótinish jazdy. Tek 5 jyl ótken soń ǵana, túlektermen jumys departamentiniń qyzmetkerlerinde mamandyq boiynsha eńbek etpeýge qatysty suraqtar týyndaǵan. Osyǵan bailanysty, atalǵan máseleniń túlektermen jumys departamentiniń qateligi ekenin moiyndaimyz», - delingen resmi akkaýnt jazbasynda.
Aita keteiik, atalǵan máselelermen ainalysqan túlektermen jumys departamentiniń burynǵy basshysy 2017 jyldyń 7 sáýirinde óz erkimen jumystan ketken.
«Qazirgi ýaqytta HBO túlektermen jumys departamentiniń qyzmetkerleri Maigúlmen habarlasty jáne máseleniń mán-jaiyn anyqtap, kómek kórsetý úshin ony ortalyqqa shaqyrdy», - dep túsindirdi HBO.
Odan bólek, jazbada «QR Bilim jáne ǵylym ministrliginiń HBO ujymynyń atynan jazylǵan aryz boiynsha keshendi qyzmettik tekserýdiń aiaqtalǵany» habarlanǵan. HBO ujymy basshylyqty jumysqa týystaryn qabyldady jáne «jerlestikke» jol berdi dep aiyptaǵan edi. Tekserý nátijesi boiynsha, atalǵan faktiler rastalmady. Búginde ortalyqta shtattyq sanatta 120 adam jumys isteidi. Onyń 7 paiyzy ǵana nemese 8 adam - Ońtústik Qazaqstan oblysynyń týmasy. Onyń ústine, atalǵan qyzmetkerler J.Meldeshov HBO basshylyǵyna taǵaiyndalmai turyp jumysqa qabyldanǵan.
