Qazaqstan Respýblikasynyń Memlekettik hatshysy Qyrymbek Kósherbaevtyń tóraǵalyq etýimen Shetelde kadrlar daiarlaý jónindegi respýblikalyq komissiianyń kezekti otyrysy ótti, dep habarlaidy Aqordanyń baspasóz qyzmeti.
Komissiia otyrysynda Bilim jáne ǵylym ministri Ashat Aimaǵambetovtiń Shetelde kadrlar daiarlaý jónindegi respýblikalyq komissiianyń hattamalyq tapsyrmalarynyń oryndalýy týraly esebi tyńdaldy, sondai-aq, «Bolashaq» halyqaralyq stipendiiasyn iske asyrýǵa qatysty birqatar máseleler qaraldy.
Konkýrsqa qatysýǵa arnalǵan qujattar «Bolashaq» halyqaralyq stipendiiasyn taǵaiyndaý úshin úmitkerlerdi irikteýdiń jańa qaǵidalaryna sáikes qabyldanady. Qaǵidalarda myna ózgerister kózdelgen: basym mamandyqtar tizbesi eńbek naryǵyndaǵy qajettilik boljamyn eskere otyryp qalyptastyrylady, aýyldyq eldi mekenderden shyqqan úmitkerlerdi qospaǵanda, úmitkerler «Bolashaq» halyqaralyq stipendiiasy sheńberinde usynylatyn sheteldik jetekshi joǵary oqý ornynan basym mamandyqqa oqý úshin shartsyz shaqyrý usyný, sheteldik joǵary oqý ornynan shartsyz shaqyrýy bar úmitker úshin GPA talaptaryn alyp tastaý, konkýrstyq irikteý kezeńderin alty týrdan úsh týrǵa deiin qysqartý, qoldanystaǵy barlyq kvotalyq sanattardy qysqartý, aǵylshyn tilinde aldyn ala tildik daiyndaý Qazaqstanda tek aýyldyq eldi mekenderden shyqqan úmitkerler úshin ǵana júzege asyrylatyn bolady. Bul rette shet tilin meńgerý deńgeiine qoiylatyn talaptar kúsheitiledi.
Sonymen qatar, «Bolashaq» halyqaralyq stipendiiasyn iske asyrýdyń jańa tásilderi engiziledi. Jańa tásilder «Bolashaq» stipendiiasyna konkýrstyq irikteý tetikterin jetildirý men avtomattandyrýdy «Prezidenttik jastar kadrlyq rezervine» irikteý tásili boiynsha júrgizýdi kózdeidi.
Otyrys qorytyndysy boiynsha Qyrymbek Kósherbaev ásirese «Bolashaq» stipendianttarynyń oqý jáne eńbekpen óteý protsesine baqylaý men monitoring júrgizýdi kúsheitý jáne Memleket basshysy Qasym-Jomart Toqaevtyń biylǵy 27 mamyrda Ulttyq qoǵamdyq senim keńesinde belgilegen mindetterdi iske asyrý boiynsha birqatar naqty tapsyrma berdi.
