Búgin Iordaniianyń Amman qalasynda ótip jatqan bokstan Olimpiadaǵa irikteý týrnirinde erler arasynda 63 keli salmaqta Zákir Safiýllin sharshy alańǵa shyǵyp, alǵashqy jekpe-jegin jeńispen bastady, dep habarlaidy "Ult aqparat".
Ol alǵashqy kezdesýdi Qytai boksshysy Jang Shanmen ótkizip, qarsylasyn jarys jolynan taidyrdy.
Osylaisha, Ǵalymbek Kenjebaev baptaityn boksshylar alǵashqy jekpe-jekterin jeńispen bastady.
Endi sanaýly minýttardan keiin 81 keli salmaqta synǵa túsetin Bekzat Nurdáýletov sharshy alańǵa shyǵady. Ol Jańa Zelandiia ókili Jerom Pompellonege qarsy shyǵady. Sondai-aq, keshki sessiiada taǵy bir boksshymyz 75 keli salmaqta Ábilhan Amanqul Olimpiada joldamasyna talasty bastaidy.
Esterińizge sala keteiik, keshe áielder boksynan sharshy alańǵa shyqqan qazaqstandyq eki sportshy qarsylastaryna jol berip, joldamadan tys qaldy. Týrnirde Olimpiada oiyndaryna barlyǵy 63 litsenziia úlestiriledi.
