Búgin Tokio Olimpiadasyna sportshylarymyzdyń alǵashqy legi attandy. Atap aitsaq, boks, dziýdo, karate, ústel tennisi, jeńil atletika jáne atý sporttarynyń ókilderi men otandyq sport salasynyń mamandary bastaǵan alǵashqy lek attanyp barady. Osy oraida tilshimiz bokstan Ulttyq quramanyń bas bapkeri Ǵalymbek Kenjebaevqa telefon arqyly habarlasyp, qandai daiyndyqpen, qansha medal alýdy josparlanǵany týraly surap bildi, dep habarlaidy QazAqparat.
- Ǵalymbek Qaliuly, búgin Tokio Olimpiadasyna attanyp bara jatsyzdar, daiyndyqtaryńyz qalai?
- Óte jaqsy daiyndyqpen attanyp bara jatyrmyz. Dál qazir áýejaida reistiń ushqanyn kútip otyrmyz. Boksshylardyń da kóńilkúii jaqsy. Basty maqsatymyz - burynǵy dástúr boiynsha kemi 3-4 medal alý.
- Naqtyly aita ketseńiz, «dástúr boiynsha» dep atap kettińiz. «Qazaq salmaǵy» atanyp ketken 69 keli salmaqtan biyl da altyn kútemiz be?
- Tek bir salmaqtan ǵana emes, barlyq salmaqtan júlde alýǵa tyrysamyz. Tokioǵa bara jatqan barlyq boksshylar jeńis tuǵyryna shyǵýǵa kúsh salatyn bolady. Tek jerebe joldas, sáttilik serik bolsa bolǵany.
- Dese de, 69 keli salmaqta el namysyn qorǵaityn Abylaihan Júsipovke dástúrdi jalǵaý mindeti artylǵan bolar?
- Árine, Abylaihan «altyn dástúrdi» ary qarai jalǵaidy dep úmittenemiz. Barlyq boksshylarǵa artylǵan mindet birdei. Ol - jeńis tuǵyrynan kóriný. Almatyda sońǵy jattyǵýymyzdy sátti aiaqtadyq. Tehnikalyq, fizikalyq jaqtan tolyqtai daiyndyqtan óttik. Tokioǵa da bir apta ýaqyt buryn ketip bara jatyrmyz. Endi, sol jaqta sheberligimizdi shyńdap, jergilikti klimatqa úirenisemiz.
- Tokioda birinshi bolyp ringke kimder shyǵady?
- Ony jerebe belgileidi. 22 shilde kúni jerebe tartý rásimi ótedi. Naqtyly sol kúni kim birinshi Olimpiadany bastaitynyn estitin bolasyzdar. Jalpy Olimpiadada eń uzaq ýaqyt synǵa túsetin boksshylar bolady. Bizdiń boksshylar jarysty 24 shilde bastap, 8 tamyz kúni, iaǵni Olimpiadanyń aiaqtalatyn sońǵy kúni eń aýyr salmaqtaǵy boksshylar synǵa túsedi. Biz barlyq salmaqtan tolyq quramda ketip bara jatymzy. Buiyrsa sońǵy kúnge deiin sharshy alańǵa shyǵamyz degen úmittemiz.
- Áńgimeńizge rahmet!
