بٷگٸن توكيو وليمپياداسىنا سپورتشىلارىمىزدىڭ العاشقى لەگٸ اتتاندى. اتاپ ايتساق, بوكس, دزيۋدو, كاراتە, ٷستەل تەننيسٸ, جەڭٸل اتلەتيكا جەنە اتۋ سپورتتارىنىڭ ٶكٸلدەرٸ مەن وتاندىق سپورت سالاسىنىڭ ماماندارى باستاعان العاشقى لەك اتتانىپ بارادى. وسى ورايدا تٸلشٸمٸز بوكستان ۇلتتىق قۇرامانىڭ باس باپكەرٸ عالىمبەك كەنجەباەۆقا تەلەفون ارقىلى حابارلاسىپ, قانداي دايىندىقپەن, قانشا مەدال الۋدى جوسپارلانعانى تۋرالى سۇراپ بٸلدٸ, دەپ حابارلايدى قازاقپارات.
- عالىمبەك قاليۇلى, بٷگٸن توكيو وليمپياداسىنا اتتانىپ بارا جاتسىزدار, دايىندىقتارىڭىز قالاي?
- ٶتە جاقسى دايىندىقپەن اتتانىپ بارا جاتىرمىز. دەل قازٸر ەۋەجايدا رەيستٸڭ ۇشقانىن كٷتٸپ وتىرمىز. بوكسشىلاردىڭ دا كٶڭٸلكٷيٸ جاقسى. باستى ماقساتىمىز - بۇرىنعى دەستٷر بويىنشا كەمٸ 3-4 مەدال الۋ.
- ناقتىلى ايتا كەتسەڭٸز, «دەستٷر بويىنشا» دەپ اتاپ كەتتٸڭٸز. «قازاق سالماعى» اتانىپ كەتكەن 69 كەلٸ سالماقتان بيىل دا التىن كٷتەمٸز بە?
- تەك بٸر سالماقتان عانا ەمەس, بارلىق سالماقتان جٷلدە الۋعا تىرىسامىز. توكيوعا بارا جاتقان بارلىق بوكسشىلار جەڭٸس تۇعىرىنا شىعۋعا كٷش سالاتىن بولادى. تەك جەرەبە جولداس, سەتتٸلٸك سەرٸك بولسا بولعانى.
- دەسە دە, 69 كەلٸ سالماقتا ەل نامىسىن قورعايتىن ابىلايحان جٷسٸپوۆكە دەستٷردٸ جالعاۋ مٸندەتٸ ارتىلعان بولار?
- ەرينە, ابىلايحان «التىن دەستٷردٸ» ارى قاراي جالعايدى دەپ ٷمٸتتەنەمٸز. بارلىق بوكسشىلارعا ارتىلعان مٸندەت بٸردەي. ول - جەڭٸس تۇعىرىنان كٶرٸنۋ. الماتىدا سوڭعى جاتتىعۋىمىزدى سەتتٸ اياقتادىق. تەحنيكالىق, فيزيكالىق جاقتان تولىقتاي دايىندىقتان ٶتتٸك. توكيوعا دا بٸر اپتا ۋاقىت بۇرىن كەتٸپ بارا جاتىرمىز. ەندٸ, سول جاقتا شەبەرلٸگٸمٸزدٸ شىڭداپ, جەرگٸلٸكتٸ كليماتقا ٷيرەنٸسەمٸز.
- توكيودا بٸرٸنشٸ بولىپ رينگكە كٸمدەر شىعادى?
- ونى جەرەبە بەلگٸلەيدٸ. 22 شٸلدە كٷنٸ جەرەبە تارتۋ رەسٸمٸ ٶتەدٸ. ناقتىلى سول كٷنٸ كٸم بٸرٸنشٸ وليمپيادانى باستايتىنىن ەستيتٸن بولاسىزدار. جالپى وليمپيادادا ەڭ ۇزاق ۋاقىت سىنعا تٷسەتٸن بوكسشىلار بولادى. بٸزدٸڭ بوكسشىلار جارىستى 24 شٸلدە باستاپ, 8 تامىز كٷنٸ, ياعني وليمپيادانىڭ اياقتالاتىن سوڭعى كٷنٸ ەڭ اۋىر سالماقتاعى بوكسشىلار سىنعا تٷسەدٸ. بٸز بارلىق سالماقتان تولىق قۇرامدا كەتٸپ بارا جاتىمزى. بۇيىرسا سوڭعى كٷنگە دەيٸن شارشى الاڭعا شىعامىز دەگەن ٷمٸتتەمٸز.
- ەڭگٸمەڭٸزگە راحمەت!
