Foto: Shymkent qalasynyń ákimidigi
Shymkent ákimi Ǵabit Syzdyqbekov álem jáne Aziia chempiondarymen kezdesip, jiynda jeńimpazdarǵa avtokólikter men baǵaly syilyqtar tabystalǵan. Bul týraly qala ákiminiń baspasóz qyzmeti habarlady.
Vedomstvonyń málimetinshe, Shymkent ákimi bokstan álem chempiondary aǵaiyndy Mahmud jáne Tórehan Sabyrhandy, Bangkok qalasynda ótken jastar arasyndaǵy Aziia chempionatynda altyn medal alǵan Sanjar-Áli Begalievti, toǵyzqumalaqtan úsh dúrkin álem chempiony Ǵalymjan Temirbaevty, sondai-aq qazaq kúresinen áskeriler arasyndaǵy álem chempiony Jumajan Qojambekovty qabyldaǵan.
Maqtanysh pen shabytqa toly atmosfera aiasynda sportshylar alǵan áserlerin bólisse, qala basshysy olardyń tamasha jetistikteriniń búkil el úshin mańyzdy ekenine toqtalǵan.
"Erik-jiger, tártip pen sportqa degen adaldyq osyndai nátijelerge jeteleidi. Sportshylarymyzdyń jetistikteri jastardy shabyttandyrady jáne Qazaqstannyń álemdik arenadaǵy bedelin nyǵaitady", - dedi Ǵabit Syzdyqbekov.
Jiyn sońynda qala basshysy chempiondardy quttyqtap, bapkerleri men tálimgerlerine alǵys aityp, jańa jetistikter men jarqyn jeńister tilegen.
Al jeńimpazdarǵa demeýshiler esebinen avtokólikter men baǵaly syilyqtar tabystalǵan.
Aita ketelik, bokstan Angliianyń Liverpýl qalasynda ótken álem chempionatynda Qazaqstan quramasy 7 altyn, 1 kúmis jáne 2 qola medal jeńip alyp, jalpykomandalyq esepte birinshi oryn aldy.
Bul álemdik dodada Mahmud Sabyrhan altyn medal enshilep, eki dúrkin álem chempiony atansa, onyń 19 jastaǵy inisi Tórehan eresekter arasyndaǵy álem birinshiligine alǵash ret qatysyp, jeńis tuǵyryna kóterildi.
