Foto: Týrizm jáne sport ministrligi
Qazaqstan Liverpýlde ótken bokstan álem chempionatynda tarihi jeńiske jetip, jalpy komandalyq esepte birinshi oryn alǵan edi. Chempiondar men olardyń bapkerlerine 100 myń AQSh dollarynan berildi, dep habarlaidyTýrizm jáne sport ministrliginiń baspasóz qyzmeti.
Týrizm jáne sport ministri Erbol Myrzabosynov sportshylarmen, bapkerlermen jáne federatsiia ókilderimen kezdesý ótkizip, jeńimpazdardy quttyqtady. Olarǵa 30-dan 100 myń AQSh dollaryna (16 million teńge men 55 million teńge aralyǵy) deiingi syiaqylar tabystaldy. Vedomstvo ókilderiniń aitýynsha, elde sportshylardy daiyndaýǵa ári qarai da nazar aýdarylady.
“Qazir biz bul sport túrin 2026–2030 jyldarǵa damytý tujyrymdamasyn ázirleýdemiz. Jaqyn arada quramynda zamanaýi zaldary men tórt ringi bar boks kafedrasy ashylatyn Ulttyq sport ýniversiteti jumysyn bastaidy”, – dep habarlady vedomstvo basshysy Myrzabosynov.
Sondai-aq Qazaqstan boks federatsiiasynyń prezidenti Shahmurat Mútálipov "Qurmetti sport qyzmetkeri" tósbelgisimen marapattaldy. Al vitse-prezident Darhan Qyzaibaev, UOK bas hatshysy Álimjan Aqaev, federatsiianyń atqarýshy direktory Raýan Igenev, bas hatshy Merei Aqshalov, erler quramasynyń bas bapkeri Qairat Sátjanov jáne áielder quramasynyń bas bapkeri Eldos Saidalin "Qurmet" gramotasyn aldy.
Sonymen qatar meditsinalyq shtab qyzmetkerleri – dárigerler Aigerim Jekeeva men Talǵat Quqanov, fiziolog Ersýltan Iýldashev jáne massajist Álibek Ábilovke ministrliktiń alǵys hattary tabystaldy.
Chempiondar men júldegerler Sanjar Tashkenbai, Mahmud Sabyrhan, Torehan Sabyrhan, Aibek Oralbai, Nazym Qyzaibai, Alýa Balqybekova, Viktoriia Grafeeva, Aida Ábikeeva, Natalia Bogdanova jáne Eldana Tálipova da qurmet gramotalary men syiaqylarǵa ie boldy.
Eske sala keteiik, Angliiada ótken jarysta Qazaqstan quramasy 7 altyn, 1 kúmis jáne 2 qola medal jeńip alyp, jalpykomandalyq esepte birinshi orynǵa ie boldy. Chempiondar qatarynda Sanjar Táshkenbai, Mahmud pen Torehan Sabyrhandar, Aibek Oralbai, Nazym Qyzaibai, Alýa Balqybekova jáne Viktoriia Grafeeva bar.
