Foto: Olympic.kz
Qazaqstandyq bylǵary qolǵap sheberi, ulttyq quramanyń kapitany Aslanbek Shymbergenov Ózbekstan astanasy Tashkentte ótip jatqan bokstan álem chempionatynda altyn júlde ielendi.
71 kelige deiingi salmaq dárejesinde synǵa túsken Aslanbek Shymbergenov ózbekstandyq Saidjamshid Djafarovpen judyryqtasyp, qarsylasynan birinshi jáne úshinshi raýndta basym tústi. Sóitip, tóreshilerdiń biraýyzdan sheshimimen jeńimpaz dep tanyldy.
Endi Tashkentte ótip jatqan álem chempionatynda taǵy bir otandasymyz - Nurbek Oralbai (80 kg) altyn medal úshin talasady.
Aita keteiik, búgin 54 kelige deiingi salmaq dárejesinde baq synaǵan qazaqstandyq Mahmud Sabyrhan ózbekstandyq Oibek Djýraevpen sharshy alańǵa shyǵyp, aiqyn basymdyqpen jeńiske jetti. "Qazaqtyń Lomachenkosy" degen laqapatqa ie daryndy boksshy qarsylasyn eki ret nokdaýnǵa da jiberdi.
Sondai-aq buǵan deiin finalda grýziialyq boksshymen qolǵap túiistirgen Sanjar Táshkenbai el qorjynyna alǵashqy "altyndy" salǵan edi. Al 67 kelige deiingi salmaqta judyryqtasqan Dýlat Bekbaýov ózbek boksshysy Asadhýdj Mýidinhýdjaevten jeńilip, kúmis júldege ie boldy.
video: Qazaqstan ulttyq arnasy
