Qazaqstandyq Abylaihan Júsipov Reseidiń Ekaterinbýrg qalasynda ótip jatqan bokstan álem chempionatynda Qazaqstan qorjynyna tórtinshi qola medal saldy, dep habarlaidy "Ult aqparat".
Abylaihan Júsipov 69 kelide reseilik boksshy Andrei Zamkovoimen qolǵap túiistirdi. Búgingi jekpe-jekte qos qarsylas tartysty báseke kórsetti. Bir-birine jumsaǵan soqqylary dál tiip jatty. Abylaihan ózinen on jas úlken reseilik bylǵary qolǵap sheberiniń osal tusyn tabýǵa barynsha tyrysty. Degenmen tóreshiler jeńisti reseilik boksshyǵa berdi.
Abylaihan Júsipov 1997 jyly Qaraǵandy oblysynda dúniege kelgen. Buǵan deiin 2017 jyly álem chempionatynda qola, Aziia chempionatynda kúmis júldeger atanǵan.
Ol 69 kelide biylǵy álem chempionatyn 1/16 finaldyq satysynan bastap, onda tailandtyq Výttichai Masýhty tize búktirdi. Odan keiin 1/8 finalda germaniialyq Nik Býrdy jeńdi. Shirek finalda Dominikan Respýblikasynan kelgen Emiliano Polankodan basym tústi.
Búgingi qarsylasy Andrei Zamkovoi - Reseidiń 32 jastaǵy tájiribeli boksshysynyń biri. Ol 2012 jyly Olimpiadada qola alsa, 2009 jyly álem chempionatynda qola júldege qol sozdy.
Buǵan deiin búgin qazaqstandyq úsh boksshy qarsylastaryna ese jiberdi. Nátijesinde Qazaqstan qorjynyna úsh qola medal tústi.
