Búgin Reseidiń Ekaterinbýrg qalasynda bokstan álem chempionaty bastalady. Qazaqstandyq boksshylar sharshy alańǵa 10 qyrkúiekte shyǵa bastaidy, dep habarlaidy QazAqparat.
Biylǵy álem chempionatynda qazaqstandyq qurama sapynda segiz sańlaǵymyz sharshy alańǵa shyǵady. Olardyń qatarynda Sáken Bibosynov (48 keli), Qairat Eráliev (57 keli), Zakir Safiýllin (63 keli), Abylaihan Júsipov (69 keli), Tursynbai Qulahmet (75 keli), Bekzat Nurdáýletov (81 keli), Vasilii Levit (91 keli) jáne Qamshybek Qońqabaev (91 keliden joǵary) bar. Qazaqstandyq boksshylar alǵashqy jekpe-jegin 10 qyrkúiekte ótkizedi.
Álem chempionaty 1974 jyldan beri turaqty túrde ótkizilip keledi. Dúbirli doda tuńǵysh ret Kýba elinde bastalǵan edi. 1986 jylǵa deiin gúrzi judyryqty jigitter tórt jylda bir márte sharshy alań tórinde sheberlik baiqasqan bolatyn. Odan keiin 1989 jyldan bastap bylǵary qolǵap sheberleri eki jylda bir márte dúbirli dodanyń kórigin qyzdyryp keledi. Sodan beri álemdik chempionatta barlyǵy 856 medal jiyntyǵy sarapqa salynypty. Onyń ishinde qazaqstandyq qurama barlyǵy 40 medalǵa qol jetkizdi. Medaldiń 11-i altyn, 12-i kúmis jáne 17-i qola bolyp sanalady.
Jalpy komandalyq kórsetkishte Kýba quramasy eshkimge des bermei keledi. Qazirgi tańda olardyń enshisinde barlyǵy 135 medal (76 altyn, 36 kúmis, 25 qola) bar. Odan keiingi oryndardaǵy KSRO-men qosa eseptegende Reseide -109 (38 altyn, 33 kúmis, 38 qola), AQSh-ta – 45 (16 altyn, 10 kúmis, 19 qola) medal bar. Jalpy alǵanda, búgingi kúnge deiin barlyǵy 57 memlekettiń bylǵary qolǵap sheberleri júldeger qatarynan kóringen.
Qazaqstan boksshylary álem chempionatyna 1993 jyldan beri qatysyp keledi. Alǵashqy básekede qazaqstandyqtar arasynan 75 kelide Vvsilii Jirov qola júldeger atandy. 1995 jyly elimizdiń qorjynyna 1 kúmis, 1 qola júlde tústi.
Atap aitqanda, 51 kelide Bolat Jumádilov kúmis, 81 kelide Vasilii Jirov qola júldege qol sozdy. 1997 jyly da dál sondai jetistik qaitalandy. Qazaqstandyq boksshylar qatarynan 71 kelide Ermahan Ibraimov kúmis, 51 kelide Bolat Jumádilov qola júldeger boldy. Al 1999 jyly Qazaqstan quramasy alǵashqy altynyna qol jetkizdi. Dúbirli dodada 51 kelide synǵa túsken Bolat Jumádilov chempiondyq tuǵyrǵa kóterilse, Muhtarhan Dildábekov (91 keliden joǵary) ekinshi, Ermahan Ibraimov (71 keli) úshinshi oryn aldy.
Al 2001 jyly bizdiń qorjynǵa nebári bir kúmis medal tústi. Ony 57 kelide sharshy alańǵa shyqqan Galib Djafarov aldy. Bul olqylyqtyń ornyn sańlaqtarymyz 2003 jylǵy álem birinshiliginde toltyrdy. Dúbirli dodada Galib Djafarov (57 keli) jáne Gennadii Golovkin (75 keli) altyn aldy. Al 2005 jyly álem birinshiliginen barlyǵy 5 medal oljalap qaittyq. Bizdiń boksshylar arasynan Serik Sápiev (64 keli) men Erdos Jańabergenov (81 keli) chempion atansa, Birjan Jaqypov (48 keli), Mirat Sársembaev (51 keli), Baqtiiar Artaev (69 keli) úzdik úshtikti túiindedi. 2007 jyly bizdiń qurama 1 altyn, 3 qola medalge qol jetkizdi. Altyn medal Serik Sápievke (64 keli) buiyrsa, Qanat Islam (69 keli), Baqtiiar Artaev (75 keli) jáne Erkebulan Shynáliev (81 keli) qola júldeger atandy. 2009 jyly bizdiń jigitter arasynan Serik Sápiev (69 keli) qola aldy.
Al 2011 jyly Serik Sápiev (69 keli) men Ádilbek Niiazymbetov (81 keli) kúmis, Ǵani Jailaýov (60 keli), Ivan Dychko (91 keliden joǵary) qola júldeger atandy. 2013 jylǵy álem chempionaty Qazaqstanda ótkizildi. Almaty qalasynda jalaýyn kótergen básekede qazaq jigitteri 4 altyn, 2 kúmis, 2 qola medal aldy. Jalpy komandalyq esepte 8 medalmen kósh basyna shyqty. Atap aitqanda, Birjan Jaqypov (48 keli), Merei Aqshalov (64 keli), Daniiar Eleýsinov (69 keli), Jánibek Álimhanuly (75 keli) chempion atandy. Al Ádilbek Niiazymbetov (81 keli), Ivan Dychko (91 keliden joǵary) kúmis, Qairat Eráliev (56 keli) jáne Berik Ábdirahmanov (60 keli) qola júldeger atandy. 2015 jyly Daniiar Eleýsinov (69 keli) pen Ivan Dychko (91 keliden joǵary) ekinshi oryndy qanaǵat tutty. Sońǵy 2017 jylǵy álem chempionatynda qazaqstandyq jigitter 1 altyn, 2 kúmis, 3 qola medaldi oljalap qaitty. Qazaqstan quramasynan quramadan Qairat Eráliev (56 keli) chempion atansa, Ábilhan Amanqul (75 keli) jáne Qamshybek Qońqabaev (91 keliden joǵary) kúmis, Erjan Jomart (48 keli), Abylaihan Júsipov (69 keli), Vasilii Levit (91 keli) úzdik úshtikti túiindedi.
Budan buryn bizdiń boksshylardyń álem chempionatyndaǵy alǵashqy qarsylastary anyqtalǵanyn habarlaǵan edik.
