Bokstan erler arasyndaǵy 2021 jylǵy álem chempionaty ótetin ýaqyt naqtylandy, dep habarlaidy "Ult aqparat".
Álemniń úzdik bylǵary qolǵap sheberleri 26 qazan men 6 qarasha aralyǵynda Serbiia astanasy - Belgrad qalasynda baq synaidy. Bul jóninde AIBA basshylyǵy málim etti.
Aita keteiik, álem chempionaty 1974 jyldan beri turaqty túrde ótkizilip keledi. Búgingi kúnge deiin qazaqstandyq boksshylar barlyǵy 46 medal enshilegen bolatyn. Olardyń 12-i altyn, 13-i kúmis, 21-i qola medal.
2019 jyly Reseidiń Ekaterinbýrg qalasynda ótken dúbirli dodada qazaqstandyq Bekzat Nurdáýletov (81 keli) altyn oljalady.
Al Qamshybek Qońqabaev (91 keliden joǵary) kúmis alsa, Sáken Baibosynov (52 keli), Abylaihan Júsipov (69 keli), Tursynbai Qulahmet (75 keli), Vasilii Levit (91 keli) qola júldeger atandy.
