Kásipqoi ringte jeńilip kórmegen qazaqstandyq boksshy Bobirjan Momynovtyń (12-0, 8 KO) kezekti jekpe-jeginiń datasy belgilendi, dep habarlaidy "Ult aqparat" Sports.kz-ke silteme jasap.
BoxRec.com. aqparaty boiynsha, Bobirjan 27 naýryzda Ekaterinbýrgte (Resei) ótetin boks keshine qatysýshylardyń biri bolady. Ol jartylai orta salmaqtaǵy IBF Baltic bos chempiony ataǵy úshin Ýkrainanyń jeńilip kórmegen ókili Edýard Skavinskiimen (13-0, 7 KO) kezdesedi. Jekpe-jektiń formaty – on raýnd.
Momynovtyń sońǵy aiqasy 2020 jyldyń 27 qyrkúieginde qazanda (Resei) ótken edi. Onda ol tóreshilerdiń kópshilik daýsymen reseilik Vaginak Tamraziannan (17-8, 5 KO) basym bolyp, jartylai orta salmaqtaǵy IBF Eurasia chempiony bos ataǵyn jeńip aldy.
Skavinskii óziniń aldyńǵy jekpe-jegin 12 qyrkúiekte sol Ekaterinbýrgte ótkizdi – ol belarýs Dmitrii Atrohovty (16-8, 7 KO) jeńgen bolatyn.
