Gaaganyń Halyqaralyq qylmystyq ister soty Resei kúshteriniń Ýkraina aýmaǵyndaǵy "áskeri qylmysyna" qatysty isterdi osy qysta qarai bastaidy. Bul jóninde Bloomberg agenttigi jazdy, dep habarlaidy Azattyq.
Alǵashqy sottyń naqty qai kúni bastalatyny belgisiz, alaida Bloomberg málimetinshe, ol ne biylǵy jyldyń sońynda, ne kelesi jyldyń basynda bastalady.
Aqparatqa qaraǵanda, Ýkraina ókilderi Halyqaralyq sotpen keminde reseilik bir áskeri tutqyndy sotqa tartý jóninde kelisip jatyr. Kúdikti Reseige qarsy kýálik berýge daiyn dep aitylady.
Ýkraina bas prokýratýrasy soǵys bastalǵaly beri Resei áskeri jasady dep aitylatyn áskeri qylmystarǵa dálelder men aiǵaqtar jinap jatyr. Naýryz aiynda Resei armiiasynyń Ýkrainadaǵy qylmystaryna dálel jinaityn arnaiy tergeý toby qurylǵan. Onyń quramyna Eýropanyń birneshe sot organ ókili kirgen. Toptyń jumysyn Eýroodaqtyń qylmystyq ister boiynsha yntymaqtastyq agenttigi qoldaidy.
6 shilde kúngi málimet boiynsha, Ýkraina bas prokýratýrasyna Resei basqynshylyǵy bastalǵaly beri 21 myńnan astam áskeri qylmys jaily málimet túsken. Ýkrainanyń burynǵy bas prokýrory Irina Venediktova britandyq BBC agenttigine kún saiyn shamamen 200-300 jańa málimet kelip túsetinin aitqan.
Gaagadaǵy Halyqaralyq qylmystyq ister soty – adamzatqa qarsy qylmys, genotsid jáne áskeri qylmystardy qaraityn memleketaralyq organ. Ol 1998 jyly qabyldanǵan Rim statýty negizinde jumys isteidi. Resei Rim statýty kelisimine qol qoiǵanmen, ratifikatsiialamaǵan. 2016 jyly sot Reseidiń Qyrym anneksiiasyn basyp alý dep tanyǵannan keiin prezident Vladimir Pýtin Reseidi Halyqaralyq qylmystyq ister sotynyń quramynan shyǵarý týraly jarlyqqa qol qoiǵan. Resei biligi Ýkrainadaǵy áskeri qylmystarǵa qatysy baryn moiyndamaidy.
