QR Ishki ister ministri Erlan Turǵymbaev blokposttardan kimder kedergisiz óte alatynyn aitty, dep habarlaidy "Ult aqparat".
«Aqmola jáne Almaty oblystarynyń aýmaǵynda postqa jetpes buryn qosymsha avtopatrýl ekipajdary qoiylady. Olar ótkizý pýnkterinde kólikterdiń kóp jinalyp qalmaýyna bailanysty túsindirý jumystaryn júrgizedi. Karantindik shekteýler kelesi azamattarǵa qoldanylmaidy. Olar: buryn shyǵyp ketken Nur-Sultan jáne Almaty qalalarynyń turǵyndary. Biraq olar 22 naýryz kúni túngi saǵat 00.00 ýaqytyna deiin oralýy kerek. Sonymen birge shetelden Qazaqstanǵa qaitqan azamattarǵa atalmysh shekteý qoiylmaidy. Basqa óńirlerdiń turǵyndary 22 naýryz kúni saǵat 00.00 ýaqytyna deiin shyǵyp ketýi kerek. Tranzitpen nemese áýe kóligimen ketýge nietti azamattarǵa da shekteý engizilmeidi. Shetelge emdelýge ketip bara jatqan azamattarǵa da shekteý bolmaidy. Biraq olarda rastaityn qujat bolýy tiis»- dedi ol «Habar 24» arnasynan tikelei efirden sóilegen sózinde.
Sonymen qatar, sheteldik memleketterdiń diplomatiialyq qyzmetiniń personaldary men olardyń otbasy múshelerine de shekteý qoiylmaidy.
«Poiyz jáne lokomotiv brigadalarynyń múshelerine, áýe kemeleriniń ekipaj múshelerine, halyqaralyq baǵytta júretin júk kólikteriniń júrgizýshilerine, qala mańynda turyp, Nur-Sultan men Almatyda jumys isteitin turǵyndarǵa, sondai-aq atalǵan qalalarda turyp Almaty men Aqmola oblysynda jumys isteitin adamdarǵa da shekteý engizilmeidi», - dedi ministr.
