Elordada karantin engizilýine bailanysty qurylǵan blok-beketten ótý úshin azamattar mindetti túrde jeke kýáligin ózimen birge alyp júrýi kerek. Bul týraly Nur-Sultan qalalyq politsiia departamenti bastyǵynyń orynbasary Aidos Rysbaev aitty, dep habarlaidy "Ult aqparat".
«Nur-Sultan qalalyq politsiia departamenti koronavirýs infektsiiasy taralýynyń aldyn alý jáne jolyn kesý boiynsha sharalar qabyldaýda. Elordalyq politsiia jeke quramy jumys atqarýdyń erekshe tártibine aýystyryldy. Politsiia departamenti 22 naýryz kúni saǵat 00-00-de elordaǵa kiretin jáne shyǵatyn joldardyń jabylatynyn eskertedi. Kólik keptelisi men kezekte turmas úshin qala turǵyndary men qonaqtaryna aldyn ala tiisti sharalar qabyldaýǵa keńes beremiz. Blok-bekettegi politsiia qyzmetkerlerine kórsetý úshin ózderińizben birge mindetti túrde jeke kýálik jáne basqa da qujattaryńyzdy alyp júrýdi usynamyz», - dedi Aidos Rysbaev «Habar 24» telearnasynyń tikelei efirinen.
Onyń atap ótýinshe, Nur-Sultan qalasynyń aýmaǵy boiynsha jaqyn mańdaǵy Jibek joly, Qosshy, Qaraótkel, Talapker, Qoiandy kentterin qosa alǵanda barlyq baǵytta 7 beket qoiyldy. Júk avtokólikteri úshin tranzitttik júrý Nur-Sultan qalasy mańyndaǵy ainalma avtojol boiynsha qarastyrylǵan.
«Karantinniń birinshi kúni tynysh ótti. Politsiia qyzmetkerleri eki minýttyń ishinde planshet kómegi arqyly elektrondy baza boiynsha tekserý júrgizdi. Tekserý barysynda shydamdylyq pen túsinistik tanytqan avtokólik júrgizýshileri men jolaýshylarǵa alǵys aitamyz. Engizilgen sharalar azamattardyń qaýipsizdigin qamtamasyz etý úshin qajet»,- dedi ol.
