Mádeniet jáne aqparat ministri Aida Balaeva 2 naýryzdan bastap infliýenserler (blogerler) áleýmettik jelilerge ornalastyratyn jarnama materialdaryn tańbalaýǵa tiis ekenin aitty. Bul «Onlain-platformalar jáne onlain-jarnama týraly» zańnyń aiasynda júzege asyp otyrǵan shara, dep habarlaidy "Ult aqparat".
Zań jobasyna byltyr 10 shildede Memleket basshysy qol qoiǵan bolatyn
"Qujattaǵy kórsetilgen negizgi quqyqtyq tetikterdiń biri – jelidegi jarnamany tańbalaý mindettemesi.
Erejeler bizneske áser etý úshin oń baǵalanǵanyn jáne tolyǵymen Qazaqstannyń onlain segmentinde keń taralǵan qazirgi tájiribege negizdelgenin atap ótý qajet. Osy erejelerdi qalyptastyrý kezinde kommertsiialyq negizde ornalastyrylǵan kontentti óz betinshe belgileitin media-sýbektiler tájiribesine súiendik. Biz óz kezegimizde osy trendti Qazaqstan Respýblikasynyń búkil internet keńistigine taratý jón dep esepteimiz.
Odan ózge osy erejege sáikes infliýenserler (blogerler) kommertsiialyq nemese sharttyq negizde ornalastyratyn onlain-jarnamany tańbalaýǵa tiis", - dep jazdy Aida Balaeva áleýmettik jelidegi paraqshasynda.
Ministr habarlaǵandai, blogerler jariialanymnyń basynda nemese sońynda onlain ortada belsendi qoldanylatyn tómendegidei tujyrymdardyń birin kórsetý kerek:
- "jarnama";
- "jarnamalyq material";
- "seriktestik material";
- "demeýshilik material";
- "jarnama quqyǵynda";
- "demeýshimen tólengen";
- "PR quqyǵynda";
- "reklama";
- "reklamnyi material";
- "partnerskii material";
- "sponsorskii material";
- "na pravah reklamy";
- "oplacheno sponsorom";
- "na pravah PR".
Áleýmettik jarnamany (qaiyrymdylyq jáne kommertsiialyq emes sipattaǵy basqa da qoǵamdyq paidaly maqsattarǵa qol jetkizýge baǵyttalǵan) jáne jedel habar almasý qyzmetterinde (messendjerler) ornalastyrylatyn jarnamany belgileýdiń qajeti joq.
Erejeler 2 naýryzdan bastap kúshine enedi.
