Jańadan sailanǵan prezident Djo Baiden ákimshiligi Resei biliginiń milliondaǵan reseilikterdiń múddesin jaqtaǵan Aleksei Navalnyidy qamaýyn qatań aiyptaidy. AQSh memlekettik hatshysy qyzmetine usynylǵan Entoni Blinken osylai dep málimdedi.
"Olardyń pikiri Reseide estilýi tiis" dedi Blinken 19 qańtar kúngi AQSh senatynyń syrtqy ister jónindegi komitetiniń tyńdaýynda. Jiynda Blinken kandidatýrasy talqylanǵan.
Germaniiadan Máskeýge oralyp, áýejaida birden ustap áketilgen Aleksei Navalnyidyń qamalýyna bailanysty pikirin jetkizgen Blinken "Vladimir Pýtinniń bir adamnan sonshalyqty qorqatyny tańǵaldyrady" degen.
Blinken senattaǵy sózinde Resei AQSh úshin másele bolyp qala beretinin, jańa ákimshiliktiń buǵan salqynqandy qaraitynyn jetkizgen.
18 qańtarda jańadan sailanǵan prezident ákimshiliginiń Tramp taǵaiyndaǵan Djon Sallivannan "Resei máselesinde úzilis bolmaýy úshin" Máskeý elshisi qyzmetinde qala berýin ótingeni belgili boldy.
Degenmen senat tyńdaýynda Resei máselesi Iran, Qytai, Kýba jáne ózge eldermen qatynas máselesi sóz bolǵannan keiin iaǵni, jarty saǵattan soń qozǵalǵan.
Navalnyidy ustaýdy osynyń aldynda AQSh memlekettik hatshysy Maik Pompeo aiyptaǵan.
"Ózine senimdi basshy qarsylasynyń úninen qoryqpaidy, saiasi opponentterine kúsh qoldanbaidy, zańsyz qamamaidy" dedi Pompeo.
Amnesty International uiymy Navalnyidy ar-ujdan tutqyny dep atap, dereý bosatýdy talap etti.
- Aleksei Navalnyi Germaniiadan Reseige 17 qańtarda oralǵan, ony áýejaida politsiia birden ustap áketti. Ertesinde sot 30 kúnge qamaý týraly sheshim shyǵardy. Bul sheshim qylmystyq jazany atqarý federaldyq qyzmetiniń Navalnyidyń shartty jazasyn túrme jazasyna aýystyrý týraly ótinishimen bailanysty.
- Pýtinniń baspasóz hatshysy Dmitrii Peskov seisenbi kúni "áldekimniń áldebireýden qorqatyny jaily joramaldardyń bári - bos sóz" dedi.
- Byltyr tamyz aiynyń sońynda komaǵa túsip, Berlindegi klinikaǵa emdeýge jiberilgen Navalnyi sol jaqta esin jiyp, qyrkúiek sońynda aýrýhanadan shyqqannan keiin Germaniiada saýyqtyrý baǵdarlamasynan ótken. Ol sodan beri Resei aýmaǵyna alǵash ret aiaq basqanda ustalǵan.
