AQSh-tyń memlekettik hatshysy Entoni Blinken CBS News arnasyna bergen suhbatynda Pekin men Vashington arasynda kikiljiń bolsa, eki eldiń múddelerine qaishy keledi dep málimdedi.
Buǵan qosa, ol "keiingi birneshe jylda Qytai óz ishinde repressiia, al syrtta agressiia kórsetip jatqanyna kýá bolyp otyrmyz. Bul – fakt" dedi.
Blinkenniń sózinshe, AQSh prezidenti Djo Baiden ákimshiligi "Qytai tarapy intellektýaldy jekemenshikti urlaýy múmkin dep qaýiptenedi". Ol Pekindi "básekeni ádiletsiz jáne jaýlasý arqyly júrgizedi" dep aiyptady. Blinken "Vashington men seriktesteri jáne Qytaiǵa ókpeli basqa elder" Pekinniń bul áreketin toqtatýy tiis dep sanaidy.
Buǵan deiin AQSh "álemdegi Amerikanyń múddelerin qorǵaý úshin" Úndi-Tynyq muhity aimaǵyndaǵy áskerin kúsheitetinin aityp, Qytaiǵa eskertý jasaǵan.
"Qytai basshysy Si Tszinpinge Úndi-Tynyq muhity aimaǵyndaǵy áskerdi kóbeitetinin aittym. Bul – janjal bastaý emes, bul – janjaldyń aldyn alý" degen edi Baiden.
AQSh prezidenti Amerika jumysshylary men kásiporyndarynyń múddesine qaishy keletin ádiletsiz saýda-sattyqqa qarsy turatynyn aitqan.
AQSh Qytaidy Shyńjańdaǵy uiǵyr, qazaq jáne basqa da musylmandardy qýadalap jatyr deidi. AQSh-tyń memlekettik departamenti Pekinniń Shyńjańdaǵy áreketin "genotsid" dep sanaidy.
