AQSh memlekettik hatshysy Entoni Blinken dúisenbi, 13 qyrkúiekte ókilder palatasynyń halyqaralyq ister jónindegi komitetinde AQSh-tyń Aýǵanstannan Amerika áskerin áketýine bailanysty suraqtarǵa jaýap berdi. Kongrestegi respýblikashyldar prezident-demokrat Djo Baidenniń Aýǵanstan boiynsha sońǵy kezdegi áreketine bailanysty máseleler qozǵaǵan.
"Amerika daýysy" saitynyń jazýynsha, kongrestegi demokrattar burynǵy ákimshilik: respýblikashyl kishi Djord Býsh pen Donald Tramp, demokrat Barak Obama men Djo Baiden ákimshilikteriniń áreketine nazar aýdartýǵa tyrysqan.
Komitette suraqtarǵa jaýap bergen Blinken Amerika áskerin Aýǵanstannan áketý týraly "Talibanmen" kelisim burynǵy Tramp ákimshiligi kezinde jasalǵanyn eske saldy. Onyń sózine qaraǵanda, Baiden inaýgýratsiiasy qarsańynda tálipterdiń áskeri pozitsiiasy myǵym bolǵan. Al AQSh-tyń Aýǵanstandaǵy áskeriniń sany 2001 jyldan beri eń tómen kórsetkishke deiin azaiǵan.
Amerikalyqtar men aýǵan azamattaryn evakýatsiialaý máselesine toqtalǵan Blinken AQSh bul protseske aldyn ala daiyndaldy dep atap ótti. Biraq onyń sózinshe, aýǵan kúshteri men úkimetiniń qulaýy evakýatsiiany asyǵys shuǵyl júrgizýge yqpal etken.
"Jyl boiy biz olardyń (burynǵy aýǵan úkimeti - red.) pozitsiiany ustap turý múmkindigine qaita-qaita baǵa berip, kóptegen stsenariidi qarastyrdyq. Tipti eń pessimistik boljamnyń ózi Kabýldaǵy úkimet Amerika kúshteri elden ketpei turyp qulamaidy degenge meńzedi" dedi Blinken.
Seisenbi kúni Blinken senattyń halyqaralyq qatynas jónindegi komitetinde jaýap beredi.
