Batys Qazaqstan oblysynyń turǵyny 170-ten astam kiik múiizimen ustaldy, dep habarlaidy "Ult aqparat".
BQO Politsiia departamentiniń baspasóz qyzmetinen túsken málimetke qaraǵanda, 28 aqpan kúni jedel izdestirý sharalary barysynda Oral qalasyna qarasty Krýgloozernyi kenti tusynda 26 jastaǵy júrgizýshi aidap kele jatqan «VAZ-2107» avtokóligi toqtatyldy.
Kólik salonynan úsh jol sómkesine salynǵan 126 dana kiik múiizi tabyldy.
Kúdikti Jańaqala aýdany Másteksai aýylynyń turǵyny bolyp shyqty. Onyń mekenjaiyn tekserý barysynda taǵy 48 múiiz tárkilendi. Kúdikti ýaqytsha ustaý izoliatoryna qamaldy.
Atalǵan derek boiynsha QR QK 399-1-baby 1-bóligine sáikes (sirek kezdesetin jáne joǵalyp ketý qaýpi bar, sonymen qatar paidalanýǵa tyiym salynǵan ósimdikter nemese janýarlar jáne olardyń derivattaryn zańsyz paidalaný) tergeý amaldary júrgizilýde.
Bul bap boiynsha aiypty adam 7-den 12 jylǵa deiin bas bostandyǵynan aiyrylýy múmkin.
Eske sala keteiik, budan buryn BQO turǵynynan 100-den astam kiik múiizi tárkilengenin jazǵan bolatynbyz.
