H.Bókeeva atyndaǵy oblystyq qazaq drama teatrynda Qazaqstan halyq jazýshysy, Memlekettik syilyqtyń laýreaty Juban Moldaǵalievtiń 100 jyldyǵyna orai «Juban» spektakli qoiylmaqshy, dep habarlaidy "Ult aqparat".
Teatr direktory Saltanat Ábilǵazievanyń brifingte málim etkenindei, bul Juban aqynǵa arnalǵan respýblikadaǵy birinshi qoiylym bolmaq.
«Juban týraly qoiylymǵa daiyndyq bastamas buryn aqynnyń týǵan jeri – Aqjaiyq aýdany, atap aitqanda, Saiqudyq, Qýrailysai aýyldaryna sapar shegip keldik.
Juban júrgen joldarmen júrip, aqynnyń beinesin, ómir jolyn jan-jaqty ashýǵa septigin tigizer derektermen tanystyq, zertteý júrgizdik. Aqyndy biletin adamdarmen tildesip, estelikterin tyńdadyq», dedi teatr direktory.
Onyń sózine qaraǵanda, qoiylym Memlekettik syilyqtyń laýreaty, aqyn Aqushtap Baqtygereeva men dramatýrg Mádina Omarovanyń týyndysy negizinde «Juban» bir aktili poetikalyq dramasy janrynda usynylmaqshy.
Spektakldi sahnalaityn – H.Bókeeva atyndaǵy oblystyq qazaq drama teatrynyń bas rejisseri, Á.Ómirzaqovanyń týǵanyna 100 jyl tolýyna orai respýblikalyq teatrlar festivaline Ermek Amanshaevtyń «Daýys nemese Daý is» absýrdtyq spektaklimen qatysyp, «Shyǵarmashylyq jetistikteri úshin» nominatsiiasynyń laýreaty atanǵan Gaýhar Adai (Manǵulova). Qoiýshy jáne kostiým jónindegi sýretshisi – Eýraziia dizainerler odaǵynyń, Eýraziia shyǵarmashylyq gildiiasynyń (London), QR Sýretshiler odaǵynyń jáne Women halyqaralyq uiymynyń múshesi, Kipr zamanaýi óner mýzeiiniń «Kúmis kilt» iegeri, Nur-Sultan qalasyndaǵy Jastar teatrynyń sýretshi-dekoratory Gúldana Jurqabaeva.
Jańa qoiylymda bári de jańasha bolmaq. Spektaklge qajetti kostiýmderdiń deni jańadan tigildi.
«Aita ketý kerek, barlyq karantindik shara qatań saqtalady.
Teatrdaǵy kórermen zaly – 310 oryndyq. Alaida zal toly kórermen jinalmaidy. Elimizde qalyptasqan jaǵdaiǵa bailanysty bul qoiylymnyń premerasy azdaǵan adam jinalatyn jabyq kórsetilim formatynda ótedi. Zalda karantindik talapqa sai araqashyqtyq saqtalady.
Meditsinalyq qorǵanysh quraldary, antiseptiktermen qamtamasyz etý qarastyryldy. Al oblys turǵyndary Juban qoiylymyn «AQJAIYQ» telearnasy arqyly tikelei efirde nemese montajdalǵan túsirilim nusqasynda kóre alady», dedi S.Ábilǵazieva.
Bul Gaýhar Adaidyń oblystyq qazaq drama teatryna bas rejisser bolyp kiriskennen bergi sahnaǵa jol tartatyn alǵashqy qoiylymy bolmaq.
Onyń aitýynsha, spektakl shovinizm beleń alyp turǵan tusta tutas álemge «Men qazaqpyn!» dep jar salǵan aqyn Jubannyń ómirdastanyn, janynan bir eli qalmai, asqaq keipin saqtaýyna sep bolǵan aqynnyń rýhyn sýretteidi.
«Myń ólip, myń tirilgen» ultymyzdyń tarihi kezeńi men qoǵam qairatkeriniń bala jastan dana jasqa deiingi júrip ótken joly egiz óriledi.
«Qoiylym Jubannyń Kolbin aldynda shyńǵyrtyp turyp shyndyq aitatyn, týǵan halqy úshin ulttyq derjavaǵa qasqaiyp qarsy shyǵatyn jinalys sátinen bastaý alady.
Aqyn boiyna daryǵan batyrlyqtyń bastaýy, ózgelerden oq boiy ozyq turýynyń syry, asqaq rýhynyń túpnegizi balalyq jáne bozbala shaǵymen, eresek ómirmen astasyp sipattalady», dedi G.Adai.
