A.Ostrovskii atyndaǵy oblystyq orys drama teatrynyń 162-maýsymy jańa premeramen ashyldy, dep habarlaidy "Ult aqparat".
Koronavirýs indetine bailanysty úzilisten keiin teatr ujymy Otfrid Proislerdiń «Kishkentai Mystan kempirin» («Malenkaia Baba-Iaga») sahnalady.
Spektakldi qoiǵan rejisser - Rýslan Djýmahmetov.
«Kishkentai Mystan kempir» ertegisi balalar, sondai-aq eresekter úshin de tartymdy. Spektakl sahnalyq kórkemdelýi men kompiýterlik jaryqtandyrylýymen erekshelenedi.
Bas rejisser Oksana Malýshanyń aitýynsha, «Kishkentai Mystan kempir» teatrdyń turaqty repertýaryna enetin bolady.
Sonymen qatar kórermender Nikolai Gogoldiń «Úilený» («Jenitba») komediiasyn (rejisseri O.Malýsha) da qyzyǵa tamashalady. Shyǵarma osydan eki ǵasyrdai buryn jazylsa da, mańyzdylyǵyn joiǵan joq.
Jańa maýsymnyń ashylýy kezinde teatr ardageri, QR mádeniet qairatkeri, trýppa meńgerýshisi Ilia Taranovqa 55 jasqa tolýyna orai qurmet kórsetildi.
«Teatrda barlyq sanitarlyq-epidemiologiialyq talaptar saqtalyp otyr, kórermender sany 50-den aspaidy. Spektaklder senbi jáne jeksenbi kúnderi qoiylady. Qazirgi tańda teatr Jeńistiń 75 jyldyǵyna orai Viktor Rozovtyń «Máńgi tiri» («Vechno jivye») shyǵarmasy boiynsha jańa qoiylymdy ázirleýde», dedi Oksana Malýsha.
