Batys Qazaqstan oblysynda Resei qalalaryna avtobýstar qaitadan qatynai bastady, dep habarlaidy QazAqparat.
BQO jolaýshylar kóligi jáne avtomobil joldary basqarmasy basshysynyń orynbasary Timýr Shiniiazovtyń óńirlik kommýnikatsiialar qyzmeti alańynda ótken brifingide málim etkenindei, óńirde jeti halyqaralyq avtobýs baǵyty (Oral-Samara, Oral-Orynbor, Oral-Toliatti, Oral-Saratov, Oral-Býzýlýk, Oral-Qazan, Aqsai-Orynbor) bar.
Onyń sózine qaraǵanda, avtobýs qatynastary karantinge bailanysty toqtatylǵan bolatyn. 14 sáýirden bastap avtobýs Oral-Samara baǵytynda júre bastady. Búgin avtobýstar Toliatti jáne Saratov baǵytynda jolǵa shyqty.
Sondai-aq Atyraý men Aqtóbege de avtobýstar qatynaidy. Alaida kassa 1 sáýirden bastap ashylǵanymen, Aqtóbege bilet satyp alýshy jolaýshylar bolmai otyr.
Shiniiazovtyń aitýynsha, oblysishilik 21 baǵytta 12 tasymaldaýshy qyzmet kórsetedi. 12 aýdannyń 11-i avtobýspen qamtylǵan. Kúni búgin Oral-Jympity baǵytynda ǵana tasymaldaýshy joq, ol aldaǵy konkýrsta anyqtalady.
2021 jylǵy konkýrstardyń qorytyndysy boiynsha jańadan 9 aýdanaralyq avtobýs baǵyty ashyldy.
«Sońǵy jyldary oblystyq biýdjetten bólinetin sýbsidiia kólemi artyp keledi. 2021 jyly respýblikalyq biýdjetten berilgen 176,1 mln teńge sýbventsiianyń 175,4 mln teńgesi igerildi. 140 572 jolaýshy tasymaldandy. Biylǵa 365 mln teńge qaraldy. Kúni búgin 7 tasymaldaýshy 11 baǵyt boiynsha sýbsidiia alyp otyr», dedi Shiniiazov.
Sol sekildi Oral qalasynyń biýdjetinen tasymaldaýshylardy sýbsidiialaýǵa jyl basynda 414 mln teńge bólindi, biylǵy sáýirde shyǵyndardy jabý úshin qosymsha 800 mln teńge qarastyrý josparlanýda.
