video kadry
Batys Qazaqstan oblysy Shyńǵyrlaý aýdany Shyńǵyrlaý aýylynda balalar jáne jasóspirimder sport mektebinde sambo kúresinen jattyqtyrýshy eki balany urǵan, - dep habarlaidy Massaget.kz portaly.
Er azamattyń balalardy uryp jatqan sátiniń videosyn "Oral aptalyǵy" redaktsiiasy jariialady.
Videoda jattyqtyrýshy jattyǵý kezinde qasyna kelgen eki balany keýdesinen, basynan urǵanyn kórýge bolady. Bir balany julqylap otyrǵyzyp alyp, betinen birneshe ret soqqan.
Taiaq jegen oqýshynyń sózinshe, ol balalardy basqa jattyqtyrýshyǵa aýysyp ketkeni úshin urǵan.
"Qai jattyqtyrýshyǵa aýyssaq ta, ózimiz bilemiz ǵoi. Dosym ekeýimizdi osy úshin urdy. Sosyn ata-anammen politsiiaǵa baryp ústinen aryz jazdyq. Sodan keiin ǵana bizden keshirim surady. Aryz jazbasaq keshirim suramaityn edi", - deidi oqýshy.
Onyń anasy Sáýle Ýáliahmetova jattyqtyrýshynyń balalardy urmaq túgili saýsaǵynyń ushyn tigizýge qaqysy joq ekenin aitty.
"Keshte jumystan kelsem, balamnyń beti qyzaryp tur. "Ne boldy?" dep surasam, aitpady. Birneshe ret suraǵannan keiin ǵana baryp, jattyqtyrýshynyń urǵanyn aitty. Onyń balamdy urýǵa qandai qaqysy bar?! Eshkim balasyn sportqa jattyqtyrýshy ursyn dep bermeidi ǵoi. Biz politsiiaǵa aryz jazǵannan keiin jattyqtyrýshy úige kelip, aiaǵymyzǵa jyǵylyp keshirim surady. Endi onyń da bala-shaǵasy bolǵasyn, qatelespeitin adam bolmaidy ǵoi dep, birjolǵa keshirim berip, politsiiadan aryzdy qaityp aldym", - deidi Sáýle Ýáliahmetova.
Al jattyqtyrýshy balalardy ashýmen urdym dep otyr.
"Jańadan bir jattyqtyrýshy kelip, meniń shákirtterimdi "tartyp aldy". Osyǵan ashýlanyp, "Nege maǵan eskertpei ketip qalasyńdar?" dep balalardy urǵanym ras. Bul qylyǵym úshin balalardan, ata-analardan keshirim suradym", - deidi ol.
Shyńǵyrlaý aýdany politsiia bóliminiń basshysy Sergei Astafev bul jaǵdai boiynsha ákimshilik hattama toltyrylǵanyn, biraq jattyqtyrýshy men balalardyń ata-anasy tatýlasqan soń, hattamany qaraý toqtatylǵanyn aitty.
Batys Qazaqstan oblysy dene shynyqtyrý jáne sport basqarmasy basshysynyń orynbasary Jeńis Nyǵmetýllin bul oqiǵadan habarsyz bolyp shyqty.
"Bizge eshkim shaǵymdanǵan emes. Siz jibergen videony kórgennen keiin ǵana bilip otyrmyz. Endi buǵan qatysty qyzmettik tergep-tekserý júrgizemiz. Sodan keiin sheshim qabyldanady", - dedi Jeńis Nyǵmetýllin.
