Batys Qazaqstan oblysynyń Aqsai qalasynda jaǵdaiy aýyr bosanǵan áieldi tikushaqpen Oral qalasyna jetkizildi, dep habarlaidy QazAqparat «Qazaviaqutqarý» AQ baspasóz qyzmetine silteme jasap.
«20 qazanda QR TJM «Qazaviaqutqarý» AQ óndiristik-dispetcherlik qyzmetine Batys Qazaqstan oblysynyń Aqsai qalasynda 1984 jylǵy áieldi shuǵyl tasymaldaý qajettigi týraly Ulttyq shuǵyl meditsinany úilestirý ortalyǵynan jedel ótinim kelip tústi. Dárigerler bosanǵannan keiingi asqynýdy boldyrmaý úshin áieldi tikushaqpen tasymaldaý jóninde sheshim qabyldaǵan», delingen habarlamada.
Oral qalasyndaǵy «Qazaviaqutqarýdyń» áýe kemesi ornalasqan jerden dereý Eurocopter EC-145 tikushaǵy ushyp shyqty. Bortta áýe kemesiniń komandiri Ashat Qudabaev jáne ekinshi ushqysh Nikolai Sorokoletov sekildi tájiribeli ushqyshtar bolǵan.
«Ushqyshtar áýe kemesin qondyrý úshin qaýipsiz oryndy anyqtady, Oral qalasynan Aqsai qalasyna deiin qysqa merzimde ushyp jetti. Onda Shuǵyl meditsinany úilestirý ortalyǵynyń akýsher-ginekologi jáne reanimatologi bar jedel járdem brigadasy kútip turdy. Áieldi 45 minýt ishinde Oral qalasynyń áýejaiyna tasymaldap, sol jerden ony aýrýhanaǵa meditsina qyzmetkerleri jetkizdi. Ushý belgilengen marshrýtqa sáikes jáne sátti ótti», delingen habarlamada.
Aita keterligi, biylǵy jyldyń 9 aiynda «Qazaviaqutqarý» AQ áýe kemelerimen shuǵyl meditsinalyq evakýatsiialaý jelisi boiynsha 629 ushý oryndalyp, ushý saǵaty 1 597 saǵat 49 minýt boldy. Bul rette 607 naýqas tasymaldanyp, oqiǵa ornynda 43 konsýltatsiia jáne UShMÚO qyzmetkerlerimen 24 operatsiia ótkizildi.
