Batys Qazaqstan oblysynda úiýli turǵan 150 tonna shóp janyp ketti, dep habarlaidy "Ult aqparat".
BQO TJ departamentiniń baspasóz qyzmeti málim etkendei, oqiǵa 16 qyrkúiek kúni saǵat 04.28-de Qaratóbe aýdany Aqqozy aýyldyq okrýginde bolǵan.
«Dosjan» sharýa qojalyǵyna qarasty Besshaǵyl qystaǵynda jinaýly turǵan 150 tonna pishen jandy.
Órt saǵat 12.28-de oqshaýlanyp, 12.51-de sóndirildi. Ony aýyzdyqtaýǵa TJ departamentinen 11 qyzmetker, 2 tehnika, erikti órt sóndirý qurylymynan 6 adam, 2 tehnika qatysty. Sondai-aq aýdandyq politsiia bóliminen 2 qyzmetker, 1 tehnika oqiǵa ornyna bardy.
Qazirgi kezde órttiń shyǵý sebebi, keltirilgen shyǵyn anyqtalý ústinde.
TJ departamenti sharýa qojalyqtary basshylarynan iri kólemdegi mal azyǵyn turǵyn úi men aýladan, joldan alys jerde saqtaýdy usynady.
