Batys Qazaqstan oblysynda sońǵy tirkelgen naýqastyń aýrýdy qaidan juqtyrǵany anyqtaldy, dep habarlaidy "Ult aqparat".
BQO shuǵyl shtaby málim etkenindei, naýqas 53 jasta, Oral qalasynyń turǵyny.
Áiel karantindik statsionarda medbike bolyp jumys isteidi. Ol aýrýdy budan buryn koronavirýs anyqtalǵan meditsina qyzmetkerinen juqtyrǵan.
Qazirgi ýaqytta naýqas oblystyq juqpaly aýrýlar aýrýhanasynda em qabyldaýda.
Aýrý oshaqtarynda dezinfektsiialyq jumystar júrgizildi. Naýqas turǵan úidiń kireberisine karantin qoiyldy.
Epidemiiaǵa qarsy is-sharalar jalǵasýda.
Osylaisha 14 sáýir kúngi málimet boiynsha BQO-da aýyrǵandar sany 12-ge jetti.
BQO taýarlar men kórsetiletin qyzmetter sapasy men qaýipsizdigin baqylaý departamenti basshysynyń orynbasary Nurlybek Mustaevtyń brifingte málim etkenindei, 13 jáne 14 sáýir kúnderi úsh naýqas tirkelse, sonyń ekeýi onyń aldynda aýyrǵan meditsina qyzmetkerimen qarym-qatynasta bolǵan.
Bulardyń úsheýimen jaqyn bailanysta bolǵandar oqshaýlanyp, tekserilip, synamalar alyndy. Olardan koronavirýs anyqtalǵan joq.
Sonymen qatar N.Mustaev áleýmettik jelilerde jalǵan aqparat tarap jatqandyǵyn jetkizdi.
«Áleýmettik jelilerde BQO-da koronavirýspen aýyrǵandar turǵan mekenjailar kórsetilgen aqparat tarady. Bul – jalǵan. Sol sekildi bir aýdiojazbada naýqastyń karantindik statsionarda jatqany aitylady. Bul da shyndyqqa sáikes kelmeidi. Koronavirýs anyqtalǵan jaǵdaida emdelýshi birden oblystyq juqpaly aýrýlar aýrýhanasyna jetkiziledi. Sondyqtan turǵyndardyń tek resmi málimetterge senýin ótinemiz», dedi N.Mustaev.
Eske sala keteiik, budan buryn Oralda meditsina qyzmetkeriniń koronavirýs juqtyrǵanyn, óńirde sońǵy tirkelgen eki naýqastyń biri Reseiden kelgenin jazǵan bolatynbyz.
