Aqjaiyq aýdandyq №2 sotynda Rýslan Makishevke qatysty úkim shyǵaryldy, dep habarlaidy QazAqparat.
BQO sotynan alynǵan málimetke qaraǵanda, 1992 jylǵy R.Makishev QR QK 106-baby 3-bóligine sáikes aiypty dep tanyldy.
Ol 11 jylǵa bas bostandyǵynan aiyrý jazasyn qaýipsizdigi barynsha joǵary qylmystyq-atqarý júiesi mekemesinde óteýge sottaldy.
Sot jaza taǵaiyndaǵan kezde buryn sottalǵan R.Makishevtiń áreketinde qylmystardyń qaitalanýy bar ekendigin eskerdi.
Sot talqysynda málim bolǵanyndai, biylǵy aqpan aiynyń ishinde Aqjaiyq aýdany Qaraýyltóbe aýylynyń turǵyny R.Makishev «Folksvagen Sharan» avtokóligin jyly jerge ornalastyrmaq bolyp, BQO TJ departamenti №27 órt sóndirý beketiniń arnaiy qoimasyna zańsyz qoiǵan. Sóitip tótenshe jaǵdai bola qalǵan órt sóndirý tehnikalarynyń oqiǵa bolǵan jerge ýaqtyly shyǵa almaý qaýpin tóndirgen. Kelesi kúni tańmen órt sóndirý bóliminiń bastyǵy Aqan Nurǵaliev atalmysh avtokólikti kórip, syrtqa shyǵartqyzyp tastaǵan.
Keiin naýryz aiynda A.Nurǵaliev túngi mezgilde R.Makishevtiń araq ishken mas kúiinde kelip, kezekshiliktegi qyzmetkerlerdiń qalypty qyzmet etýine kedergi keltirip júrgenin bilgen. Sodan keiin ony shaqyrtyp alyp, avtokóligin ruqsatsyz qoiǵany jáne mas kúiinde qyzmetkerdiń mazasyn alǵany úshin eskertý jasap, sondai áreketteri qaitalanatyn bolsa, politsiiaǵa habarlaitynyn aitqan.
Alaida 25 naýryz kúni saǵat 22.30 shamasynda R.Makishev mas kúiinde órt sóndirý bólimine qaita kelip, kezekshilikte bolǵan júrgizýshi N.Mursalimovtan bastyǵyn shaqyrtýyn talap etken. Ruqsatsyz qyzmet bólmesine kirip, óziniń zańsyz is-áreketterin jasyrý maqsatynda beinekameralardy syndyryp, isten shyǵarǵan.
Qyzmet ornyna kelgen A.Nurǵaliev R.Makishevten úiine baryp, demalýyn ótingen. Áitse de R.Makishev onyń zańdy talabyna baǵynbai, qyzmet kiiminiń jaǵasynan alyp, kúsh qoldanǵan. Aqyry A.Nurǵaliev betine tigen soqqylar saldarynan oqiǵa ornynda esinen aiyrylǵan.
A.Nurǵaliev esin jiyp, óz-ózine durys kelmesten, bas kiimsiz, jalań aiaq R.Makishevtiń úiine baryp, syrtqa shaqyrǵan. Sottalýshy úidiń aýlasyna shyǵyp, taǵy da áldeneshe ret soqqy jumsaǵan.
A.Nurǵaliev áke-sheshesiniń úiine baryp, jazǵy sarai ishinde esinen aiyrylyp qalǵan. 26 naýryz kúni saǵat 08.30-da ony es-tússiz kúiinde jeńgesi tapqan. Aqjaiyq aýdandyq aýrýhanasyna jetkizilgenimen, bir kúnnen keiin saǵat 05.03-te A.Nurǵaliev alǵan jaraqattary saldarynan qaitys boldy.
R.Makishev kinásin ishinara moiyndap, jábirlenýshini óltirý oiynda bolmaǵanyn jetkizdi.
Sot úkimi zańdy kúshine engen joq.
