Jańaqala aýdandyq sotynyń úkimimen Larisa Qojahmetova asa aýyr qylmysty habarlamaǵany úshin QR QK 434-babyna sáikes aiypty dep tanyldy, dep habarlaidy "Ult aqparat".
Jańaqala aýdandyq sotynan túsken málimetke qaraǵanda, L.Qojahmetovaǵa 3 jylǵa bas bostandyǵyn shekteý jazasy belgilendi.
Sotta anyqtalǵanyndai, 2019 jylǵy naýryzda Jańaqala aýdany mektep-gimnaziiasynyń direktory L.Qojahmetova mektep psihologtary men 5 synyp oqýshysynan qyz balaǵa qatysty ógei ákesiniń seksýaldyq sipattaǵy is-áreketter jasaǵandyǵyn bilgen.
Sodan keiin L.Qojahmetova óz kabinetinde mektep qyzmetkerlerin jinap, jiyn ótkizgen. Sol jiynda Qojahmetova oqiǵany quqyq qorǵaý organdaryna habarlaýǵa tyiym salǵan, sondai-aq oqýshynyń sheshesinen qyzyn basqa mektepke aýystyrýdy talap etken.
L.Qojahmetovanyń qylmystyq áreketsizdigi saldarynan qyz balaǵa qatysty seksýaldyq sipattaǵy is-áreketter ógei ákesimen eki márte jasalǵan.
Sottalýshynyń kinási kýálardyń bettestirý, júrgizý hattamalarymen dáleldenedi.
Osyǵan deiin zańdy kúshine engen sot úkimimen qyz balanyń ógei ákesi seksýaldyq sipattaǵy is-áreketter jasaǵany úshin 22 jylǵa bas bostandyǵynan aiyrylǵan bolatyn.
Prokýror L.Qojahmetovaǵa bas bostandyǵyn shekteý jazasyn taǵaiyndaýdy surady.
L.Qojahmetova kinásin moiyndaǵan joq.
Qylmystyq kodekstiń 434-babynyń sanktsiiasymen aiyppul (6 myń AEK-ke deiin), túzeý jumystary, 6 jylǵa deiin bas bostandyǵyn shekteý nemese sol merzimge bas bostandyǵyn aiyrý jazasy kózdelgen. Zań boiynsha, eger qylmys úshin jazanyń birneshe túri kózdelgen bolsa, sot aldymen jazanyń jeńil túrin taǵaiyndaý múmkindigin qaraýy tiis. Bul jaza túrin taǵaiyndaýǵa negiz bolmaǵan jaǵdaida ǵana neǵurlym qatań jaza túri taǵaiyndalady.
L.Qojahmetovanyń buryn qylmystyq jaýapkershilikke tartylmaǵanyn eskerip, sotta eń qatań jaza taǵaiyndaýǵa negiz bolǵan joq.
