Batys Qazaqstanda oqystan mert bolǵan kiikterdiń ushalaryn joiý kezinde tiri qalǵan kiikter de birge kómilgen, dep habarlaidy QazAqparat QR Ekologiia, geologiia jáne tabiǵi resýrstar ministrligi Orman sharýashylyǵy jáne janýarlar dúniesi komitetine silteme jasap.
Buǵan deiin habarlanǵandai, 2021 jyldyń 13 mamyrynda BQO Jánibek aýdany Taý kentiniń janynan 372 ólgen kiik ushasy tabylǵan. Aldyn ala aqparat boiynsha, janýarlardyń ólim sebepteriniń biri osy aimaqtaǵy qolaisyz aýa raiyna bailanysty bolýy múmkin (nóser jańbyr men naizaǵai), óitkeni qańqalarda naizaǵai razriadynyń izi qalǵan.
Ólgen janýarlardy jinaý jáne joiý jumystaryn Taý aýyldyq okrýginiń ákimdigi júrgizgen.
«2021 jylǵy 17 mamyrda áleýmettik jelilerde Batys Qazaqstan oblysynda oqystan mert bolǵan janýarlardyń óli ushalaryn joiý kezinde kezdesken tiri kiikterdiń beinejazbasy taratyldy. Oqiǵaǵa bailanysty Orman sharýashylyǵy jáne janýarlar dúniesi komiteti janýarlarǵa jasalǵan kez kelgen qatygezdikti aiyptaidy jáne osy saladaǵy zańbuzýshylarǵa tózbeitinin jetkizedi! Bul másele komitettiń qatań baqylaýyna alyndy», - dep habarlady Orman sharýashylyǵy jáne janýarlar dúniesi komitetinen.
QR Ekologiia, geologiia jáne tabiǵi resýrstar ministrliginiń resmi ókili Samal Ibraeva oblystyq Politsiia departamentine shaǵym túsiriletinin, jazyqsyz janýarlarǵa salǵyrttyq tanytqandardyń jazalanatynyn jazdy.
