Batys Qazaqstan oblysynda ataqty ánshi-kompozitor Muhit Meráliulynyń 180 jyldyǵyna arnalǵan «Án qudiretin asqaqtatqan Muhit sal» atty respýblikalyq dástúrli ánshiler baiqaýynyń jeńimpaz-júldegerleri anyqtaldy, dep habarlaidy QazAqparat.
Saiys alty alashqa án ozdyrǵan sal Muhittyń týǵan jeri – Qaratóbe aýdanynda ótti.
Eki kúnge sozylǵan, úsh kezeńnen turatyn baiqaýǵa Qazaqstannyń jeti oblysynan 17 úmitker qatysyp, baq synady.
Baiqaýdyń sharty boiynsha qatysýshylar alǵashqy kezeńde Muhittyń keń tynysty týyndysyn jáne óz óńirinen shyqqan halyq kompozitorlarynyń bir ánin oryndady.
Sodan keiin jerebe tartý arqyly dástúrli án mektepterinen bir týyndyny, óz qalaýy boiynsha halyq ánin shyrqady.
Sońǵy kezeńde úmitkerler Muhittyń «Ainamkóz», «Pańkóilek» sekildi týyndylarynyń bireýin jáne óz qalaýymen bir ándi tyńdarman nazaryna usyndy.
«Qurmet» ordeniniń iegeri, Ǵ.Qurmanǵaliev atyndaǵy oblystyq filarmoniianyń solisi Qairat Kákimov bastaǵan qazylar alqasynyń sheshimimen mańǵystaýlyq Nurym Asqanov bas júldeni jeńip aldy.
Pavlodarlyq Dáýrenbek Slamǵaliev birinshi, batysqazaqstandyq, Qaratóbe topyraǵynyń túlegi Nurshat Islamǵaliev pen atyraýlyq Baibaqty Idirbai ekinshi, almatylyq Qairatbek Bektursyn men taǵy bir atyraýlyq Fatima Serikbaeva úshinshi orynǵa kóterildi.
Muhit toiyna Almatydan belgili ánshi, Qazaqstannyń eńbek sińirgen qairatkeri, «Daryn» memlekettik jastar syilyǵynyń iegeri Sáýle Janpeiisova da arnaiy keldi.
Barlyq qatysýshylarǵa kádesyilar berilip, jeńimpaz-júldegerler diplomdarǵa qosa aqshalai syilyqpen marapattaldy.
