Oral qalasyndaǵy fizika-matematika baǵytyndaǵy Nazarbaev ziiatkerlik mektebiniń 9-synyp oqýshysy Ainamkóz Rafihova ulttyq mazmundaǵy «Zerek» atty ústel oiynyn qurastyryp shyǵardy, dep habarlaidy "Ult aqparat".
Ainamkózdiń aitýynsha, munda oiynshylardyń qazaq halqynyń maqal-mátelderi, ertegiler, jańyltpashtar, yrym-tyiymdar men turaqty tirkester boiynsha bilimi tekseriledi.
Aldymen arnaiy zańdylyqtarǵa sai oiynnyń qozǵalys tártibi, ýaqyty, erejeleri, oiynshylar sany jáne túrli bonýstar júiesi oilastyryldy. Oiyn alańynda barlyǵy 57 uiashyq, olardyń arasynda tuzaq (ot jáne sý), bonýs jáne aqyly uiashyqtar bar. Oiyn bastalysymen birinshi oiynshy súiekti laqtyryp, óz qadamyn jasaidy. Ol 100 suraq kartasynyń birin tańdap, oǵan jaýap berýi qajet. Tuzaq uiashyqtaryna túsip qalsa, ot uiashyǵynan Kóltaýysar, al sý uiashyǵynan Jelaiaq qutqara alady. Eger oǵan qajet keiipker túspese, oiynshy sol uiashyqta qala beredi. Kerisinshe, ózge oiynshynyń kezegi kelgende 2500 (bonýs túrindegi qaǵaz banknottar) aiyppul tólep, óz jolyn jalǵastyra alady. Márege kim birinshi jetse, sol jeńimpaz atanady.
«Zerek» mazmunyna «sýrettegi maqal-máteldi jalǵastyr/tap», «frazeologizm, yrym-tyiym maǵynasyn ashý, «jańyltpashty qaitalaý», ertegiler men ańyzdar boiynsha erýditsiiany tekserý, jumbaqtardy sheshý siiaqty suraqtar kiredi.
Avtordyń sózine qaraǵanda, naryqta «Qoltyraýyn», «Monopoliia» siiaqty orys tilindegi ústel oiyndary kóp, biraq, ókinishke orai, ana tilinde ulttyq mazmundaǵy oiyndar joqtyń qasy.
Ústel oiyndary adamnyń aqyl-oi, psihologiialyq damýyna úles qosyp, kishkentai oiynshylardyń saýsaq motorikasyn nyǵaitady eken. Oiynnyń taǵy bir qyzmeti aqparatty qabyldaý, oilaý negizderin, problemalardy ońai sheshý, bútin men bólshekterdi ajyratý syndy kognitivti daǵdylardy damytady.
Ainamkóz oiyndy synyptastarymen synap kórdi. Sondai-aq jobanyń qaǵaz nusqasy Oral qalasyndaǵy balalar aýyly tárbielenýshilerine tanystyrylyp, syilyq esebinde usynyldy. Sonymen qatar «Zerektiń» elektrondy nusqasy daiyndaldy (https://my.flipbookpdf.net/7k2rP) .
– Ulttyq mazmundaǵy ústel oiynynyń jahandaný kezeńindegi mańyzy erekshe, aldaǵy ýaqytta oiyn sharttary týraly qosymsha qural daiyndaý josparda bar. Sonymen birge «Kókpar», «Qyz qýý» ulttyq oiyndarynyń sharttaryna negizdelgen ulttyq mazmundaǵy ústel oiynyn qurastyrmaqpyn, – deidi avtor.
Ainamkóz joba barysynda baǵyt-baǵdar bergen jetekshileri – qazaq tili men ádebieti pániniń muǵalimi Jansáýle Maqsotova men óner pániniń muǵalimi Janna Qulbekovaǵa alǵysyn jetkizdi.
