Batys Qazaqstan oblysy Jańaqala aýdandyq aýrýhanasynda medbike on jylǵa jýyq bilimi týraly jalǵan diplommen jumys istegen. Bul jaitty memlekettik mekemeniń direktory akkreditteýden ótý kezinde anyqtaǵan, - dep habarlaidy Tengrinews.kz.
Akkreditteýden ótý kezinde meditsinalyq mekeme óz qyzmetkerleriniń diplomdaryn qaita tekseredi. Tekserý úshin olardyń tizimi mamandardy daiarlaýmen jáne oqytýmen ainalysatyn joǵary oqý oryndary men kolledjderge jiberiledi.
"Ambýlatoriianyń 37 jastaǵy qyzmetkerinde meditsinalyq kolledjdi bitirgeni týraly diplom kóshirmesi boldy. Biraq aqparatty tekserý kezinde kolledjde ondai túlek joq ekeni anyqtaldy. Tekseris kezinde áiel dekrettik demalysta bolǵan. Ol diplomnyń túpnusqasyn joǵaltyp alǵanyn aityp, óz erkimen jumystan bosatý týraly ótinish jazdy. Men quqyq qorǵaý organdaryna júginýge májbúr boldym. Bul oqiǵany elemeýge bolmaidy. Ol adamdardy emdeidi", - dedi BQO Jańaqala aýdandyq ortalyq aýrýhanasynyń direktory Serjan Esengúbekov.
