Batys Qazaqstan oblysynda koronavirýs juqtyrǵandar sany 360-qa jetse, sonyń 214-i Oral qalasynda tirkeldi, dep habarlaidy "Ult aqparat".
Oral qalasynyń ákimi Abat Shynybekov málim etkendei, 81 adam – Reseiden, al 55-i – Atyraýdan kelgender. Tórt adam aýyr halde.
«Eger alǵashqy kezde juqtyrýshylar sany syrttan kelgenderden quralǵan bolsa, sońǵy qala men aýdan turǵyndary arasynda taralyp jatyr. Olardyń ishinde 9 bala bolsa, sonyń bireýi bir jasta. Koronavirýs infektsiiasyn 9 politsei, 56 meditsina qyzmetkeri, 5 zeinetker, 3 stýdent juqtyrǵan. Qalyptasqan jaǵdaidyń kúrdeli ekendigin eskere otyryp, qala turǵyndaryn karantindik-sanitarlyq talaptardy saqtaýǵa shaqyramyn. Turǵyndar barynsha ózin oqshaý ustaýǵa, aralas-quralastyqty azaitýǵa, asa qajettilik bolmasa, úiden shyqpaýǵa, ózge adamdarmen bailanysty shekteýge umtylǵany abzal. Kóp jaǵdaida koronavirýs infektsiiasy aýrý belgilerinsiz ótkenimen, ózgelerge juǵýy múmkin. Qalada karantin rejimi saqtalǵanyn eskere otyryp, qaýipsizdik sharalary – qorǵanys maskasy men qolǵabyn kiip, antiseptikti qoldanýdy umytpaý kerek», dedi Abat Shynybekov.
Oblystyq juqpaly aýrýlar aýrýhanasynyń direktory Nadiia Ahmetovanyń naqtylaýynsha, 9 balanyń da aýrýy baiqalmai ótýde. Sonyń ishinde bir jasqa deiingi bala úi karantininde jatyr.
«Qazaqstannyń bas memlekettik sanitar dárigeriniń qaýlysyna sáikes aýrý belgisi baiqalmaityndar tekserilgennen keiin emhana dárigerleriniń baqylaýymen úi karantininde bola alady», dedi QazAqparat tilshisine N.Ahmetova.
BQO ákimdiginen alynǵan málimetke qaraǵanda, sońǵy tirkelgen 8 naýqastyń úsheýi – Reseide jumys isteitin oblys turǵyndary. Bes adam – buryn koronavirýs juqtyrǵandarmen bailanysta bolǵandar.
Óńirde aýyrǵan 360 adamnyń 210-y jazylyp shyqty.
