Batys Qazaqstan oblysynda koronavirýsqa shaldyqqandar arasynda zeinetkerler sany kóbeiip otyr, dep habarlaidy "Ult aqparat".
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵali Aryspaevtyń óńirlik kommýnikatsiialar qyzmeti alańynda ótken brifingte málim etkenindei, sońǵy kezde indettiń óse túskeni baiqalady.
Onyń sózine qaraǵanda, qyrkúiekte koronavirýsty 111 adam juqtyrsa, qazan aiynyń basynan beri 137-ge jetti.
Aýyrǵandardyń 65-i nemese 47,6 paiyzy –zeinetkerler. Bul turǵyndar arasynda toi, sadaqa siiaqty kópshilik sharalarǵa barýdyń tyiylmai otyrǵanyn kórsetedi. Sondai-aq 26 jumyssyzdan (18,9 paiyz), jumys jasaityn 23 adamnan (16,8 paiyz), 12 meditsina qyzmetkerinen (8,7 paiyz), 7 muǵalim men tárbieshiden (5,1 paiyz) jáne 2 oqýshydan (1,4 paiyz) koronavirýs anyqtaldy.
Qazirgi tańda oblystyq juqpaly aýrýlar aýrýhanasynda 71 adam emdelip jatyr. Sonyń altaýy jansaqtaý bóliminde.
Bul aýrýdy asqyndyryp alýdyń, ýaqtyly emdelmeýdiń saldarynan bolyp otyr.
Reseide koronavirýsqa bailanysty kúrdeli jaǵdai qalyptasyp otyrǵany belgili. Soǵan bailanysty kórshi elmen shekaradaǵy tórt avtoótkelde sanitarlyq talaptar kúsheitilgen bolatyn. 6 qazannan beri COVID-19-ǵa anyqtamasy joq 738 adam eki kúnge karantindik statsionarǵa jatqyzylyp, sonyń 18-inen indet tabyldy.
Sonymen qatar 26 qazannan beri halyqaralyq tasymaldaýdy júzege asyratyn PTR anyqtamasy joq júrgizýshilerdi tekserý bastaldy. Anyqtamasyz ótken 544 júrgizýshiden synama alynyp, sonyń úsheýi koronavirýs juqtyrǵan bolyp shyqty. Úsheýi de – Oral qalasynyń turǵyndary.
«Ókinishke qarai, oblysta toi, sadaqa sekildi kópshilik jiyndar ótkizý jalǵasýda. 158 monitoringtik top 17 tamyzdan beri 440 nysanda zańnyń buzylǵanyn anyqtady.
QR Ákimshilik quqyqbuzýshylyq kodeksi 425-baby 1-bóligine sáikes 317 hattama toltyrylyp, 15 mln astam teńge aiyppul salyndy. Shekteý sharalaryn únemi buzyp otyrǵan 6 nysannyń qyzmetin toqtatý týraly aýdanaralyq ekonomikalyq sotqa talap aryz berildi. Meiramhanalarmen qatar qaladaǵy iri saýda úileri men bazarlarda da sanitarlyq talaptar saqtala bermeidi. Sondai-aq turǵyndar da maska kiiýdi umytpaýy kerek. Eger bul talaptar saqtalmai, indet órshise, ony qatańdatýǵa májbúr bolamyz», dedi M.Aryspaev.
