Batys Qazaqstan oblysynda koronavirýsqa shaldyqqan 92 adam aýyr halde jatyr, dep habarlaidy "Ult aqparat".
BQO densaýlyq saqtaý basqarmasynyń basshysy Bolatbek Qaiýpov málim etkendei, óńirde ahýal óte kúrdeli bolyp otyr.
Meditsinalyq kómekke júgingender sany arta túsýde. Táýligine jedel járdemge 1200-den astam qońyraý shalynady.
Kúni búgin juqpaly aýrýlar jáne provizorlyq aýrýhanada tósek sany 717 bolsa, sonyń 72 paiyzynda adamdar jatyr. 30-dan astam naýqas jasandy tynys alý apparatyna qosylsa, 52 adam ottegi maskasyn tutynýda.
Aýrýhanalar dári-dármektermen qamtamasyz etilgen, taiaýda taǵy da ákelinedi. Ár aýdandyq aýrýhanada provizorlyq tósek-oryndar ashylǵan. Tórt aýdanda juqpaly aýrýlar tósek-orny bar.
Oblystyq kópbeiindi aýrýhanada 20-dan astam medbike jáne 30 kishi qyzmetker, qalalyq aýrýhanada 30 medbike, 40 kishi qyzmetker jetispeidi.
B.Qaiýpovtyń sózine qaraǵanda, indetpen kúreske 700-den astam meditsina qyzmetkeri jumyldyrylǵan. Olardyń 150-den astamy ózderi aýyryp, emdelip shyqty.
Naýqastar óte kóp kelip jatyr. Jaǵdaiy óte aýyr adamdar birinshi kezekte qabyldanady.
«Emdelýshilerdiń kóbeiýine bailanysty jańadan jabdyqtar satyp alýdamyz. Búgin 21 jasandy tynys alý apparaty statsionarǵa jetkizildi. Ol úshin «QPO b.v.» kompaniiasyna alǵysymyzdy bildiremiz. Osy aptada ottegi kontsentratorlary ákelinedi. Oblystyq aýrýhanada ekinshi korpýsty ashamyz. Bul asa qiyn jaǵdaida jumys jasap jatqan dárigerlerge túsetin júktemeni azaityp, emdelýshilerdi kóbirek qabyldaýǵa múmkindik beredi», dedi Bolatbek Amangeldiuly.
